Rokstu sagataveja: portals lakuga.lv

Kulturys īsacejumus novembra pādejai nedeļai īsoka tradicionaluos dzīduošonys grupys “Saucējas” daleibneica Kristīne Jansone. 26. novembrī “Saucējas” aicynoj iz Zīmeļlatgolys teiciejis Margaritys Šakinys (1926–2014) symtgadei veļteitu dzīšmu vokoru. Pasuokuma mierkis ir gūdynuot tautys teiciejis pīmiņu, popularizēt juos dzīšmu repertuaru i rūsynuot sabīdreibys interesi par Latvejis, eipaši Latgolys, namaterialuo kulturys montuojuma boguoteibom. Dzīšmu vokors ir vīns nu pasuokumu, kas paradzāti dzīduotuojis 100 godu jubilejis atguoduošonai 2026. godā.

Īpazeit Latvejis kulturvītys ar Janīnys Kursītis jaunuokū gruomotu

Patriotiskuo novembra mieneša nūslāgumā ir īspieja papyldynuot sovys zynuošonys par mozuok pazeistamom kulturys vītom, tautom i tradicejom Latvejā, īsaguodojūt i skaitūt Janīnys Kursītis jaunuokū gruomotu “Latvijas kultūrvienības jeb mazie novadi”. Gruomotā cyta storpā apraksteiti Ludzys igauni i Abrinis teritorejis dzeivuotuoji.

Margaritys Šakinys dzīšmu vokors

Kotram, kas grib nu sirds izadzīduot itamā nedeļā, juoīt iz teiciejis Margaritys Šakinys dzīšmu vokoru, kas nūtiks 26. novembrī 19 stuņdēs Reigā, Latvejis Kulturys akademejis telpuos, Mīra īlā 58a. Itymā vokorā kūpā ar grupom “Saucējas”, “Grodi” i “Burdons” varēs dzīduot tolku i kuozu dzīsmis, kai ari cytys Zīmeļlatgolai rakstureigys daudzbaļseiguos dzīsmis, kai ari dzierdēt etnomuzykologu i folkloristu stuostus par teicieju Margaritu Šakinu. Byus ari čajs, kopeja i peirāgi. 

Ekspoziceja par prokrastinaceju

Ka kaidam ir vajadzeiga īdviesme, kab pabeigtu rodūšū dorbu, īsoku apmeklēt izstuodi “Prokrastinācija un radīšana” Reigā, Latvejis Nacionaluo rakstnīceibys i muzykys muzeja jaunajuos telpuos. Vairuoku izstuodē puorstuovātūs īvārojamu muziku i rakstnīku vydā ir ari Latgolā dzymuši autori – mežaradznīks Arvīds Klišāns, komponists Juoņs Ivanovs, dzejneica Bronislava Martuževa i operys dzīduotuoja Alīda Vāne –, kurūs prokrastinacejis īrodumi i ceinis sporu styprynūšī citati ir īkļauti ekspozicejā.