Rokstu sagataveja: portals lakuga.lv

4. decembrī Reigā, kulturys nomā “Atmoda”, nūtiks “Impro bomža” aba Mareka Ruskula improvizāta izruode latgaliski “Kas byus, tū kristeisim”. Mareka sapyns jau kaidu laiku bejs nūspēlēt izruodi latgaliski. Niu atrads sev dūmubīdrus i aicynoj iz improvizaceju, kurys nūsaukums izsoka vysu tuos byuteibu. 

Mareks ir nu Rēzeknis, tok jau lobu šaļti dzeivoj i dorbojās Reigā. Vosorā izdevs zeimiejumu gruomotu “#2”, kurā apkūpuoti 16 godu laikā topuši zeimiejumi, stuosteni i eisys pruotulys. Gruomotā ir ari pa kaidam zeimiejumam, kas rodūšīs, Mareka personeiguos Latgolys īdvasmuoti. Vaicuots, voi taida zeimiejumu gruomota varātu dreizumā izīt ari latgaliski, jis stuosta: “Kod es sataiseju itū gruomotu, tod maņ ruodejuos, ka varātu sataiseit gruomotu ari latgaliski, bet kaidu daļu varātu radeit originali latgaliski. Maņ ruodīs, ka latgalīši varātu byut apsavainojuši iz mani, ka es nazeimeju, narokstu latgaliski. (Smejās.)” 12. decembrī 13 stuņdēs sevkurs teik aicynuots ari iz gruomotys “#2” prezentaceju Rēzeknis Centralajā bibliotekā. 

Mareks stuosta, ka latgaliskuo juo kasdīnā nav cīši daudz: “Mama ir nu Rogovkys, tāvs nu Mežavydu, kas tīpat natuoli. Kasdīnā vysuvaira latgaliski saīt runuot ar vacuokim, muosu i bruoli. Niu ari saisteibā ar izruodi. Es improvizeju jau kaidi septeni godi. Pyrma diveju godu roduos dūma, ka varātu improvizēt latgaliski, byutu interesanti. Nikur naredzieju. Tikai šūgod es aizsuoču “Impro bomzi” – taids nūsaukums deļtuo, ka nav sātys maņ, nav vīnys grupys, ar kū improvizeju. Itys ir formats, kurā varu īlikt jebkū. Es gribieju latgalīšus. Atrodu grupu “ĀrprāTS”, jī nazkod seņ ir spieliejuši latgaliski. Es jūs uzrunuoju, i jī pīkryta. Ar jim spieliesim pyrmū reizi. Vyss vokors paradzāts latgaliski!” 

Sovu improvizacejis pīredzi jis pats raksturoj ar vuordu “ceļuojums”. 4. decembrī jis pīpiļdeis sovu sapynu par izruodi latgaliski. Tuos nūsaukums “Kas byus, tū kristeisim” precizi aproksta izruodis byuteibu. Mareks atkluoj, ka izruodei nikas nav sagatavuots: “Interesanti ir tys, ka vysi tū vaicoj. Bet vyss nūtiks iz vītys. Cerams, ka tai gaumeigi mes lavīrēsim caur klišejiskū i nazkū jaunu.” Teicīņs, kas ir izruodis nūsaukumā, atguojs ari saisteibā ar gruomotu “#2”, kod pošam Marekam bejušys švuorbys par tuos izdūšonu. Muosa mīrynuojuse taišni ar itim vuordim. 

Improvizāta izruode “Kas byus, tū kristeisim” nūtiks kulturys nomā “Atmoda” (Reiga, Stabu īla 10 k-2). Ar Mareku kūpā spieļuos Didzis Siliņš, Ketija Duļbinska i Edžus Lagzdiņš nu improvizacejis teatra “ĀrprāTS”. Īīšona pasuokumā par zīduojumu.