Latgolys Kulturviesturis muzeja atjaunuotajuos telpuos, Atbreivuošonys alejā 102, Rēzeknē, nu 3. maja otkon byus atvārta muzeja laseitova – ari vierteigu latgalīšu gruomotu kruotuve.

Muzeja laseitova struodoj nu 1989. goda, kod beja lels pīprasejums piec trimdys literaturys.

Niule kruotuvē ir apmāram 29 000 vīneibu. Ite ir pīejama dažaida veida literatura. Kai pastuosteja laseitovys vadeituoja Anna Tihomirova, vysvairuok ļauds interesejās par nūvodpietnīceibu. Taipoš ir interese par tautys tārpim, folkloru.  Amatīru teatra dalinīki ite atrūn īstudiešonai pīmāruotys latgalīšu lugys. Laseitovā ir pīejama ari zynuotniskuo literatura, kas ir lobs materials zynuotniski pietnīciskajai darbeibai.

Gruomotys laseitovai bīži vīņ teik duovynuotys. Ite ir Latgolys Kulturys centra izdevnīceibā izdūtuos gruomotys, Vladislava Luoča gon Latvejā, gon trimdā latgaliski izdūtuos gruomotys i daudzi cyti duovynuojumi. Lai papyldynuotu kruojumu, gruomotys teik ari pierktys.

Ka ir interese i vajadzeiba piec kaidys vierteigys latgalīšu gruomotys, byusit gaideiti Latgolys Kulturviesturis muzeja laseitovā! Muzejā pi reizis var apsavērt ari kaidu nu izstuodem!

Laseitovys dorba laiks majī:

Ūtartdiņ, trešdiņ, catūrtdiņ, pīktdiņ – 10:00 – 17:00,

Sastdiņ – 10:00 – 16:00