Reigā, Raksnīceibys i muzykys muzejā, par tradiceji ir klivuši cykla „Dzīšmu klade” sareikuojumi, i 12. janvarī 17:30 sevkurs interesents teik aicynuots naformalā gaisūtnē apgiut dzīsmis, kurys iz Sibiri sev leidza aizvaduši īceļuotuoji nu Latvejis.

Dzīduošona nūtiks Sibira latvīšu dzīšmu vuocieju Jantys i Ilmāra Mežu vadeibā. Vokora gaitā tiks atskaņuoti teicieju bolsu īroksti, piec dzīsmis nūsaklauseišonys dalinīki tū izdzīduos poši. Kab vuordu naprasme natraucātu dzīduošonys prīcai, teksts tiks projicāts iz ekrana. Pasuocīnī byus ari nalels stuostejums par Sibira latvīšu dzīduošonys tradicejom. Vairuoku paaudžu nūškierteibā dzīsmis, kurys vēļ arviņ dzīd gon Sibira, gon Latvejis latvīši, īgivušs atškireigu skaniejumu. Sibirī sasaglobuojušs ari dzīsmis, kas Latvejā jau aizmierstys.

Pasuocīnī atguojušī dzīduot grybātuoji vuiceisīs dzīsmis, kas iz Sibiri aizvastys nu vysys Latvejis – nu Malīnys (Olyuksna apleicīnis), nu Kūrzemis, kai ari nu Latgolys – skanēs Sibira Timofejevkys cīmā saklauseituos dzīsmis.

„Dzīšmu klade” ir sareikuojumi, iz kurim teik gaideits sevkurs dzīduot grybātuojs naatkareigi nu prasmis nūturēt meldeju ci īprīškejūs pasuocīņu apmekliejuma – golvonuo ir gribiešona dzīduot. Dalinīki aicynuoti jimt leidza kladis, kuruos pīraksteit pasuocīnī dzīduotuos dzīsmis, kab tuos piečuok varātu izmontuot dažaiduos dzeivis situacejuos. Dzīduošona nūteik kotra mieneša ūtrajā caturtdīnē 17:30 stuņdēs. Iz pavasara pusi paradzāti ari tik Latgolys pusis dzīsmem veļteiti sareikuojumi.

Īejis moksa sareikuojumā – LVL 1,50; pensionarim, studentim i školānim – LVL 1.