16. februarī 8:15 nu reita, kab pīminātu Latgolys kulturys darbinīku – muzykys pedagodu, varganistu, kūrdirigentu, komponistu, ailinīku i eisprozys dorbu autoru Ontonu Matvejānu, Drycanu vydsškolā nūtiks pasuocīņs „Ontonam Matvejānam – 75” – skaitejumi „Tu nuoci pi manis nu saules…”

Ontons Matvejāns dzims taišni pyrma 75 godu – 1937. goda 16. februarī Drycanu pogostā i sova myuža laikā devs nūzeimeigu īguļdiejumu Latgolys kulturys dzeivē.

Aicynojūt iz pasuocīni, Drycanu vydsškola soka: „Kab ustobā īītu saulis gaisma, ir juoatdora lūgi, durs. Cytaiž byus tymss. Saulei ir daudzi spaitu. Sevkurs nu tim paleidz izstaruos gaismu i syltumu zemei, cylvākim. Kab cylvāks spātu izstaruo i duovuot gaismu cytim, jam juobyut eipašam. Ari Drycanu pogosta slavanuokū, īvāruojamuokū cylvāku – Ontonu Matvejānu var saleidzynuot ar sauli. Tik daudzi talanta spaitu jis izstaruoja: školuotuojs, katehets, komponists, maestro varganists, ailinīks, rakstnīks, sabīdriskais darbinīks, sovys sātys saiminīks. Juo īguļdiejums i davums dzymtajam pogostam, nūvodam i Latvejai ir nanūviertiejama boguoteiba.”

16. februara reitā Drycanu vydsškolā pīminēs Ontonu Matvejānu, kaviesīs atmiņuos, skaiteis fragmentus nu juo dorbim i klauseisīs dzīšmu īrokstus.

Vaira dazynuošonai par Ontona Matvejāna myuža guojumu.