„Tik vareiba vysim kūpā – īdzeivuotuojim, izjiemiejim, pašvaļdeibom, NVO i ministrejom – taiseit regiona atteisteibys procesu, na vertikali pījimti politiski i administrativi lāmumi, nūdrūsynoj padareitūs pasuocīņu efektivitati i pozitivu ilgtermeņa atteisteibu” – saceja vidis aizsardzeibys i regionaluos atteisteibys ministrs Edmunds Sprūdžs 2012. goda februarī aicynojūt kotru Latgolys i ari Latvejis īdzeivuotuoju, izjiemieju i pašvaļdeibys darbinīki īsnīgt sovys idejis Latgolys regiona atteisteibai.

Ministreja ir sajāmuse vaira kai 400 īrūsynuojumu, ideju, konkretu pīduovuojumu par regionā doromim pasuocīnim izjiemejdarbeibā, izgleiteibā, infrastrukturys izlobuošonā i cytuos sferuos. Vysi īrūsynuojumi teik strukturāti izviertieti ekspertu grupuos, atrūnūt svareiguokūs doromūs aktivitašu vierzīnus, kas izsokomi atslāga vuordūs – mobilitate, sadarbeiba, resursu pīeimameiba, iniciativa.

2012. goda 11. aprelī Daugovpiļs Universitatē nūtiks regionalais forums „Iespēju Latgale”, kurā kotrs interesents varēs īsapazeit ar sajimtim īrūsynuojumim i giut īskotu ideju apkūpuošonys i analizis procesā. Forumu vadeis Haralds Burkovskis i tymā pīsadaleis ari vairuoki ministri (vidis aizsardzeibys i regionaluos atteisteibys ministrs Edmunds Sprūdžs, ekonomikys ministrs Daniels Pavļuts i c.). Kotrs interesents teik aicynuots pīsaregistrēt daleibai forumā VARAM sātys lopā īsnādzūt ANKETU. Tim, kas nabyus Daugovpilī iz vītys, byus vareiba viertīs forumu ari škārsteikla puorraidē VARAM sātys lopā.