10. i 11. augustā Raiņa muzejā „Jasmuiža” itūgod ūtrū reizi tiks kūrts Latgolys keramikys vacmeistara Andreja Paulāna ceplis – gostūs gaideis cepļa kūršonys i attaiseišonys pasuokums, par kuru jau 14. reizi atbiļdeigī byus tautys lītiškuos muokslys studeja „Rēzeknes apriņķa pūdnīki”. Ceplis byus veļtejums Ontonam Ušpeļam (senioram) juo 100. jubileja godā.

10. augustā keramiki ar sovim apdadzynuošonai sagatavietajim muola traukim pīpiļdeis cepli i ap pušdīnis laiku tū īkūrs. Itūreiz golvonī atbiļdeigī par pūdu apdadzynuošonu byus keramiki nu Bolvu nūvoda Bierzpiļs pogosta – Jolanta i Valdis Dundenīki.

Cikom ceplis kūrsīs, vokora laikā byus īspieja apsarunuot ar pūdnīkim, viertīs cepļa kūršonys procesu i lelū guni (ap pusnakti).

Par keramiķu dorba rezultatu varēs puorsalīcynuot 11. augustā, kod 11:00 byus vēļ korstū i glazātū trauku izjimšona. Traukus grybātuoji iz reizis varēs ari nūpierkt.

Pyrma cepļa attaiseišonys tiks reikuota viktorina ar vaicuojumim par Latgolys keramiku, tuos topšonys niansem, viesturi, formom i glazurom. Par pareizom atbiļdem byus ari bolvys. Viktorinu vadeis pūdnīks Andris Ušpeļs.

Īejis moksa iz cepļa attaiseišonys pasuokumu i muzeju – 1,00 Ls.