Novembra beigys Rēzeknis Augstškolai i piļsātai jau 16. godu saistuos ar Andrejdīnom. Itūgod Andrejdīnys nūtiks dreizuok — 22. novembrī i byus vīns nu Latvejis–Lītuvys–Boltkrīvejis puorrūbežu programys projekta LLB-2-269 “Virtualuo paguotne — muzeju byutīne” pasuokumu.

“Volūdu krystpunktūs” — tys ir ituo goda Andrejdīnu moto, partū ka pasuokumā pīsadaleis na tik Latgolā pazeistmi literati (V. Lukaševičs, A. Rancāne, Raibais, I. Atpile-Jugane i cyti), jaunuos paaudzis puorstuovi, muziki (Sovvaļnīks, “Kapļi”, A. Slobožaņins, G. Rasims), bet ari gosti nu Boltkrīvejis I Lītuvys.

Literati i muzyki nu treju vaļstu gatavuos kūpeigys performaņcis, tulkojūt dzeju boltkrīvu, latvīšu, latgalīšu, lītavnīku, angļu ci krīvu volūduos, puorrunojūt literaturys aktualitatis sovā zemē i pasaulī, pīsadolūt storptautyskuos konfereņcis “Krystpunkti pīrūbežys kulturā, volūdā, viesturē” dorbā.

Pasuokumā kai vysod, naizpaliks bez puorsteigumu skateituojim, byus īspieja kūpā ar muzikim izspēlēt datorspēli “Nūej tī, nazyn kur, atnes tū, nazyn kū”, nūteikt skateituoju simpateju i pasaklauseit vysaidu volūdu saspēli emoceju i dūmu apmaiņā.