Jau trešu godu Daugovpiļs Marka Rotko Muokslys centrā byus apsaverama Latgolys regiona muokslys dīnu izstuode, kurys tema itūgod ir “Klaunade”. Izstuodē aicynoj pīsadaleit vysu medeju muokslinīkus i muokslys studentus. Dorbi īsnādzami da 15. marta. Kotrys autors dreikst īsnēgt ni vaira kai četrus dorbus.

Izstuode īcerāta kai spylgta i kruosaina, emocionala i breivdūmeiga regiona muokslinīku radeitūs dorbu skate, paruodūt lobuokū muokslinīciskū veikumu, kas radeits laikā nu 2013. da 2015. goda.

Izstuodis reikuotuoji cer, ka tuos tema ļaus muokslinīkam īsajust klauna tālā voi sovūs dorbūs saredzēt ar itū temu saisteitys uorejis i īškejis izpausmis muokslys volūdā realizietajūs dorbūs.

Iz izstuodis atkluošonys laiku tiks izdūts izstuodis katalogs. Nu izstuodis nūslāgumā atseviški dorbi, kas atbylst Daugovpiļs Marka Rotko Muokslys centra budžeta vareibai, tiks īpierkti centra kolekcejis papyldynuošonai.