Da 7. maja Leivuonā, Latgolys muokslys i omotnīceibys centrā, apsaverama Tautys lītiškuos muokslys studejis “Dubna” 35 dorba godu jubileja izstuode.

Par gūdu jubilejam vysim interesentim byus apsaverama studejis dalineicu dorbu izstuode. Godim eimūt, mainūtīs paaudzem, kolektivā īīt vys jaunys rūkdorbneicys. Tautys lītiškuos muokslys studejā “Dubna” dorbojās 15 izdūmys boguotys i darbeigys dalineicys, kuru dorbi ari byus apsaverami itamā izstuodē.

Leivuona nūvods vysod bejs boguots ar ausšonys tradicejom i profesionalom audiejom. Tautys lītiškuos muokslys studejis “Dubna” viesture saistuos ar 1972. godu, kod Monika Mančinska apvīnuoja audiejis ausšonys puļceņā ar nūsaukumu “Dubna”.

Suocēs aktivs darbeibys process. Audieju i rūkdorbneicu veikums tyka atzineigai nūvārtāts i jau 1979. godā “Dubnai” tyka pīškierts Tautys lītiškuos muokslys studejis nūsaukums. I tai jau 35 godus Tautys lītiškuos muokslys studeja “Dubna” sagloboj i atteista senejuos ausšonys tradicejis, pietej Latgolai rakstureiguos senejuos rokstu zeimis i īauž tuos myusdīneiguos tekstilejuos.