Roksta autors: portals lakuga.lv

17. augustā Preiļūs gostu sātā “Pie Pliča” prezentēs foto gruomotu “Latgales ainava”, atkluojūt Latgolys dobys vīnreizeigumu i šmukumu. Gruomota ir veiduota kai duovona Latvejis symtgadē, stuosta tuos idejis autors, fotografs Igors Pličs.

Kab gruomotai atlaseitu karteitis, tics reikuots fotokonkurss, kurymā daleibu jēme 98 autori nu vysys Latvejis. “Piec styngrys atlasis gruomotā publicāti 74 autoru 285 dorbi. Biļdēs īmyužynuotys Latgolys ainovys, ari piļsātainova,” soka I. Plicš.  Gruomotā īkļauts muokslys zynuotneicys Ingrīdys Burānis aproksts par ainovu i literatis Annys Rancānis prīškvuords, gruomotys beiguos pīvīnuots Igora Pliča teksts. Gruomotys teksti veiduoti latgalīšu rokstu, latvīšu literarajā, krīvu i angļu volūduos.

Ar fotografa Igora Pliča guodeibu ir izguojušs vairuokys foto gruomotys, kurymuos īmyužynuoti Latgolys ļauds i ainovys. Pārņ par gūdu Latgolys kongresa symtgadei prezentēja fotogruomotu “Latgalietis XXI gadsimtā”, kurymā atrūnamys cylvāku kartenis nu vysu Latgolys nūvodu. Sovukuort 2013. godā izguoja unikala gruomota “Latgale fotogrāfijā”, tei topa 10 godu laikā i tymā īkļautys 500 biļdis.