Latgolys muokslinīku jaunuokūs dorbu izlase izstuodē “Pēdas/Pādi”

Latgolys muokslinīku jaunuokūs dorbu izlase izstuodē “Pēdas/Pādi”

Rokstu sagataveja: Edeite Husare, portals lakuga.lv

Vēļ tik pādejuos dīnys Latgolys kulturviesturis muzejā apsaverama tradicionaluo Latgolys muokslinīku jaunuokūs dorbu izstuode “Rudiņs 2021” ar nūsaukumu “Pēdas/Pādi”, viestej muzejā daīmamuo informaceja.

Latgolys Kulturviesturis muzejā Rēzeknē nu 17. novembra da 18. decembra apsaverama kasgadejuo Latgolys muokslinīku izstuode, kuruos moto itūgod ir “Pēdas/Pādi” – pādi, kū kotrā nu myusu pamat nūtikšonys, satiktī ļauds, šaļtenis. Gaistūšī pādī i vierteibys, kuruos palīk, gribiešona pamest pādus, bet tai preteimā – dzēst i aizmierst nūtykušū. Ari napīdzeivuotais, tuolais, viesturis pagrīzīņa punkts var taišni voi natīši giut dzili i iz ilga. Pādi, kū pamess itei dīna, i vaicuojums, kaidu tū redzēs i sajuss, kai vērtēs cylvāks iz prīšku?

Latgolys Kulturviesturis muzeja Muokslys nūdalis vadeituoja Inese Dundure portalam lakuga.lv stuosta, ka idejai par itaidu kasgadeju Latgolys muokslinīku izstuodi ir senejis saknis – myusu laiku izstuodis tradiceja aizasuokuse 1996. godā, kod Rēzeknē tyka svieteita 1936. goda II Latvejis pļuovis svātku, kurymūs beja ari muokslinīku dorbu izstuode, godadīna, i roduos ideja atjaunuot izstuodis tradiceju – leidza ar tū itūgod Latgolys muokslinīku izstuode svietej 25 godu jubileju. Reizē itaida izstuode ir ari 70.–80. godu profesionalūs muokslinīku izstuožu, kurūs organiziešonys dorbus dareja muokslinīks, profesors Osvalds Zvejsaļnīks, tradiceja, kurei iz kaida laika beja pagaisuse. Atškireibā nu tuo laika myusu dīnu izstuodēs ir naviņ profesionalūs muokslinīku dorbi, nu kūpeigā izstuodē var pīsadaleit ari studenti aba tūpūšī muokslinīki i muokslinīki-autodidakti.

Nu vysu īsnāgtūs dorbu izstuodis dalinīkus izavielej žureja. Inese vys soka, ka ituo laika izstuodis vysā navar saleidzynuot ar sovulaik nūtykušajom profesionalūs muokslinīku izstuodem, jo pīsadola plotuoks muokslinīku spektrys. Ka tūlaik muokslinīki izstuodei tykuši specialai paaicynuoti, niu dorbus īsnādz poši dalinīki, bet tūs viertej i atlosa žureja, kurymā ir muokslinīki, kurī napīsadola izstuodē, vītejī muokslys viesturnīki i ari Latgolys Kulturviesturis muzeja darbinīki. Kai breineigu nūtikšonu Inese viertej muzeja vareibu piečuok lobuokūs dorbus nūpierkt i papyldynuot muzeja kruojuma Latgolys muokslinīku dorbu fondu: “Mes asam laimeigi par itaidu vareibu, jo tei ir īspieja sekuot leidza Latvejis muokslai leidza i turēt rūku iz pulsa!”

Itūgod izstuodē “Pēdas/Pādi” apsaverams 42 muokslinīku 61 dorbs. Inese Dundure soka, ka pādejūs divejus godus leidza ar pandemejis apstuoklim dorbs pi izstuodis taiseišonys bejs drupeit gryušuoks, jo ilgi navariejs saprast, voi izstuode varēs byut voi vys tik nabyus, leidza ar tū intensivuok vajadzējs ari struoduot ar Latgolys muokslinīku uzrunuošonu. Jei ir prīceiga, ka vys tik itūgod “zaļajā režimā” izstuodi var kluotīnē apsavērt ari vysi grybātuoji. “Kotru godu rudiņa muokslinīku izstuode teik gaideita kai taids puorsteigums – daži autori palīk sovūs asūšajūs izteiksmis leidzekļūs, turpynojūt atteisteibu, cyti otkon puorlauzuši sevi i atroduši jaunus ceļus, aiz tuo itei izstuode vysod ir interesanta. Taipat ari ir eipaša kotra muokslinīka interpretaceja par izstuodis moto, kai nu kurais tū iztver, ītylpynojūt tymā plotu temu lūku. Vysod prīcynoj, ka izstuodē apsaverami ari jaunūs i da ituos nadzierdātūs muokslinīku dorbi, par pīmāru, itūgod taida ir Dace Losāne ar sovim keramikys dorbim. Lela prīca ir par studentim, kurī, sekojūt pasnīdzieju īsacejumim, ari suoc itaida veida rodūšū darbeibu i pīsadola izstuodē.”

Pīktdiņ, 17. decembrī, i sastdiņ, 18. decembrī, Latgolys Kulturviesturis muzejā izstuodi “Pēdas/Pādi” var apsavērt nu 10.00 da 18.00.

Izstuodis katalogs apsaverams ite:

Galerejā Latgolys muokslinīku dorbu izstuode “Pēdas/Pādi”, foto Edeite Husare/lakuga.lv.

no images were found

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]