Rotko centrā apsaverama Latgolys regiona muokslinīku izstuode (+FOTO)

Rotko centrā apsaverama Latgolys regiona muokslinīku izstuode (+FOTO)

Rokstu sagataveja: Beāte Poikāne portalam lakuga.lv

Daugovpiļs Marka Rotko muokslys centrā leidz 26. juņam apsaverama kasgadejuo Latgolys regiona muokslinīku izstuode. Verūtīs iz nūteikūšu pasaulī, tys pats kas cytur, nūteik ari Latgolys regionā, deļtuo izstuodei izvālāts nūsaukums “Nav izņēmums”. Beidzamūs godu nūtykumi beja lels izaicynuojums kulturys sferai, tymā skaitā ari muokslai. Tok muokslys dzeive naapsastuoja i turpynuoja pylnveiduotīs – muokslinīku rodūšums izapaude jaunūs dorbūs.

Tradicionali pavasara sezona Marka Rotko muokslys centrā īsasuoc ar Latgolys regiona muokslinīku jaunuokūs dorbu izstuodi. Itys projekts puļcej muokslinīkus kūpeigā izstuodē jau nu muokslys centra atkluošonys 2013. godā. Itūgod izstuodē apsaverami 44 Latgolys muokslinīku dorbi nu dažaidu Latgolys vītu. Muokslys dorbūs atspīgeļuotys namaineiguos muokslys vierteibys, kai ari puormainis i sajiutys, kas skuorušys kasdīnys dzeivi beidzamajūs div godūs. Interesanti, ka izstuodē vairuokūs dorbūs dominej zyluo kruosa. Kai kontrasts tai tyka izvālāts dzaltons. Itaidu kruosu izviele sasaslādz ari ar nūtykumim pasaulī itūšaļt.

Rotko centra vadeituojs Māris Čačka portalam lakuga.lv stuosta, ka taipat kai cytu regionu muokslinīki, ari Latgolys muokslinīki aug i atsateista myusu ocu prīškā. “Tys ir lels nūtykums regiona kulturys telpai. Nanūlīdzami Rotko centrs deve itū lelū stimulu, lai muokslinīki, kuri dzeivoj regionā, atsateisteitu i tīktūs uz tom viersyunem, kuruos īprīšk varbyut navarēja sasnīgt. Caur daleibu izstuodē, muokslinīkim ir īspieja tikt pamaneitim, kas paver ceļu daleibai ari cytūs projektūs Latvejā i pasaulī.”

Pīsadaleišona izstuodē nūteik konkursa kuorteibā, atlosūt piec kvalitativūs kritereju. Lela nūzeime ir izstuodis temai. Vysi dorbi navar tikt pajimti, jo izstuodē ir svareigi izveiduot sovstarpeju dialogu, sasaisti storp dorbim. Muokslinīki īsnādz dorbus, kas topuši beidzamūs treis godu laikā.

Itūgod izstuodē pīsadola muokslinīki: Alīna Petkune, Agita Zemīte, Ludvigs Bērziņš, Aivars Bulis, Ilgvars Zalāns, Ilona Linarte Ruža, Dace Pudāne, Anastasija Dubovska, Žanna Vērdiņa, Svetlana Saveļjeva, Aiva Žūriņa, Inguna Liepa, Imants Haņeckis, Ingūna Levša, Ilze Griezāne, Ēriks Volonts, Anna Silabrama, Sanri, Nataļja Marinoha, Eleonora Pastare, Annele Slišāne, Viktorija Grappa, Vija Stupāne, Ksenia Shinkovskaya, Kristīne Nicmane, Diāna Apele, Darja Smirnova, Edgars Vronskis, Oksana Vronska, Vēsma Ušpele, Ilona Abdulajeva, Una Gura, Dāvis Ieviņš, Valija Platace, Sarmīte Bogdanoviča, Nellija Dzalba, Viktorija Valujeva, Agra Ritiņa, Ivo Folkmanis, Uldis Čamans, Mairita Folkmane, Aleksandra Šļahova, Lilija Zeiļa, Andris Bižāns.

Vaicuots, voi car itū izstuodi Rotko centrs nūsaver ari kaidus potencialūs muokslinīkus, kam varātu kod naviņ iz prīšku byut ari personalistuode muokslys centrā, Māris Čačka atzeimoj, ka īprīškejā sezonā pīdzeivuotuo muokslineicys Agrys Ritinis izstuode “Kronis” ir vīns nu taidu pīmāru, kas car grupys projektim, pa vīnam dorbam radzūt, nūguoja da personalizstuodis. Māris atsazeist: “Itūreiz maņ personeigs puorsteigums ir tekstilmuokslineica Annele Slišāne. Varbyut cikom da gola es nanūviertieju juos dabiskūs materialu dečus, bet itys dorbs “Salāpīt debesis” ruodīs kai simboliski, tai kompozicionali ir izteikti jauns punkts juos daiļradē, atteisteibā, kas ir leidzvierteigs breineigam škīdru voi tekstila muokslys dorbam, kas varātu byut izstuodeits sevkurā vītā pasaulī.”

Daugovpiļs Marka Rotko muokslys centra marketinga specialists Aivars Baranovskis atzeimoj, ka Latgolys muoksla ir stuostūša muoksla, kas baļsteita vizualitatē i tālūs. “Muokslys nūzeime teik vārsta iz dorba rezultatu, na muokslinīka darbeibu. Latgolai rakstureiga ari materialitate. Tys izapauž izmontuotajā materialu daudzveideibā – muols, škīdrys, metals… Muoksla ir kai muoka, kai prasme. Taišni ituos īzeimis ir vairuok rakstureigys Latgolai,” tai Aivars Baranovskis.

Galerejā Latgolys regiona muokslinīku izstuode “Nav izņēmums”, foto Edeite Husare/portals lakuga.lv

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
Mar
31
Svā
all-day Izstuode “Latgales keramikas stā... @ Daugovpiļs Muola muokslys centrs
Izstuode “Latgales keramikas stā... @ Daugovpiļs Muola muokslys centrs
Mar 31 all-day
Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā. “Kotrys dorbs sovā byuteibā ir unikals i naatkuortojams, kotram[...]