Rokstu sagataveja: portals lakuga.lv

Vēļ junī rakstejom par grupu “Reibums”, kura koč ari dybynuota jau 2020. godā, aktivi koncertēt i publicēt jaunys dzīmys suokuse viņ itūgod. Niu grupai izguojušys div jaunys dzīsmis “Nanormals” i “Kafeja i cigaretis”.

Grupa “Reibums” īt nu Rēzeknis nūvoda Kaunatys pogosta. Itūšaļt grupā spieļoj treis cylvāki – Vitaļs (gitara i vokals), Imants (basgitara i vokals) i Valers (bungys). Vaira par grupu var izzynuot rokstā ITE.

Jau īprīšk grupys puiši tyka sacejuši, ka raudzeis “turēt tempu” i izdūt pa vīnai jaunai dzīsmei mienesī. Julī grupa publiciejuse dzīsme “Nanormals”, kas ir taišni pīmāruota, kab kuorteigi i drupeit nanormali izatrokuotu kaidā grupys “Reibums” koncertā.

Dzīsmem vuordus pamatā roksta grupys vokalists Vitaļs, tok ari puorejī grupys puiši gona aktivi īsasaista, palobojūt voi papyldynojūt dzīšmu tekstus.

Sovpus tikū, augusta vydā, izguojuse vēļ vīna jauna dzīsme “Kafeja i cigaretis”. Grupys solists Vitaļs vys pīzeist: “Raksteit dzīšmu vuordus nav muna stypruokuo puse, deļtam bīži viņ par īdvasmu kolpoj kaida filmā voi gruomotā atrosta fraze. Cerams, ka kotrys, kas klausuos myusu dzīsmis atrūn tamuos sev atbylstūšu nūzeimi.”