Kulturys īsacejumi Adventa laikam: nūīt iz bazneicu i gostūs, sataiseit svātku kartenis
Rokstu sagataveja: portals lakuga.lv
Kristeigajā bazneicā pyrma kotru lelu svātku ir paradzāts eipašs laiks, kab cylvāki varātu sasagatavuot svātku svieteišonai. Koč ari nūtikšonys, kurys kotru godu pīmynam, ir nūtykušs viesturiski seņ, vystik tūs jāga i viestejums īt cauri laikim i dūmuots kotram cylvākam. Laiks pyrma Jezus Kristus dzimšonys svātku saucās Advents. Tuos ir četrys nedelis, kuruos ticeigī ir aicynuoti puordūmuot, kū jūs dzeivē nūzeimej ticeiba Dīvam i kai Jezus pīdzimšona ir ītekmiejuse jūs i apleik asūšūs cylvāku dzeivi. Kam es tycu? Kas maņ juodora, kab es byutu gareiguoks? Kai lai palīku par lobuoku cylvāku? Tī byutu daži vaicuojumi, kas juoaizdūd sev pošam Adventa laikā. Itymā nedelī Ludzys draudzis vikars, prīsters Lauris Kārklis aicynoj:
Nūīt iz bazneicu
Tai kai Advents ir saisteits ar kristeigū tradiceju, tod itymā laikā, kai jau prīsters, es aicynoju cylvākus īt iz bazneicu, pasakavēt atmiņuos par bierneibys laiku, atguoduot par sovim tyvajim cylvākim i padūmuot par pīdūšonys i izleigšonys temom. Taipat pasalyugt par saimi i mīru pasaulī.
Apmeklēt seņ nasatyktūs
Apmeklēt seņ nasatyktūs saimis lūcekļus i draugus. Kotram nu myusu nūteikti ir kaidi tyvi cylvāki, pi kurūs jau seņ asam sūlejuši nūbraukt gostūs. Sova laika duovuošona ūtram cylvākam i patīsi loba duovona. Ka nav vareibys fiziski nūbraukt, vysod var pīzvaneit voi uzraksteit i apsavaicuot, kai īt i voi vyss labi.
Izveiduot Zīmyssvātku kartenis
Izveiduot sovys Zīmyssvātku kartenis. Myusu dīnuos asam roduši mudri apsveikt i syuteit loba vieliejumus caur teleponim i e-postim, tok, cik pateikamai ir sajimt eistu Zīmyssvātku karteņu pa postu voi taišni rūkuos. Tys daudzim byutu lobs puorsteigums, kas atguodynuotu par laikim pyrma vyrtualūs apsveikumu, a kaidam tys byutu koč kas piļneigi jauns.
