Rokstu sagataveja: portals lakuga.lv

Pi skaiteituoju tics žurnala “A12” apreļa/maja numers i tymā var puorskaiteit sarunys ar Daugovpiļs teatra aktrisi Kristīni Veinšteinu, dzejneicu Dagneju, prīsteri Rinaldu Broku i cytys sarunys i stuostus.

Žurnala “A12”, kas ir vīneigais žurnals, kas viestej par Latgolys ļaudim i jūs stuostim, redaktore Ināra Groce ituo numera īvodā soka: “Kasgadejuo “Boņuka” bolvys padūšona ir nūzeimeigi svātki i goda laikā Latgolys viesturiskuos zemis kulturtelpā radeitūs snāgumu izviertiejums. Atmiņā īsaspīde arhitekta Austra Mailīša vaicuojums – kas ir stypruoks – kara voi gora spāks? Gora spāks nav namaineiga vīneiba, tys juotrenej i juonūryuda. Kas styprynoj gora spāku? Dūmys, vuordi i dorbi. Sasatikšona ar gorā styprajim roda puorlīceibu, ka seikuos kasdīnys klopotys ir vīgli puorvaramys, svareiguokais ir klauseit sirdsbolsam.”

Žurnala “A12” apreļa/maja numerī skaitit:

• Interveju ar Latgalīšu kulturys goda bolvys “Boņuks 2023” myuža bolvys sajiemieju Jezupu Dobkeviču.
• Deļkuo armejis dzeivē var saredzēt leidzeibu ar prīstera dzeivi – saruna ar katuoļu goreidznīku i kapelanu Rinaldu Broku.
• Pyrmū reizi publicāta Ilzis Spergys 1997. gods interveja ar Ontonu Kūkuoju.
• Klauseit sirdsbolsam i atsagrīzt Latgolā – Džeinys Gavaris i Kārļa Vinceviča atzinis.
• Aktrise i teatra muokslys pedagoge Kristīne Veinšteina rauga īstudēt Blaumani latgaliski i jiutās gondareita, ka Daugovpilī vys bīžuok var dzierdēt latgalīšu volūdu.
• Aizceļuosim iz vītu Daugovys krostā – Markovu.
• Zylupi – vītu, kur Latveja sasateik i draudzejās ar sauli – pietej geografs Ivars Matisovs.

Jaunuokajā žurnalā “A12” vysu rokstu vydā ari portala lakuga.lv redakcejis komandys taiseitī stuosti – ar Kristīni Veinšteinu sasarunoj Laura Melne, bet interveju ar pietneicu Lolitu Uozuoliņu, kai ari dzīšmu stuostus sagatavejuse Edeite Laime. Taipat žurnalā puorskaitoma portala redakcejis sagataveituo informaceja par jaunuokajim gruomotu i muzykys izdavumim.

Žurnals “A12” ir vareiba jau vaira nakai 10 godus izzynuot par dzeivi i ļaudim Latgolā i pasaulī, puorskaiteit dažaidus dzeivisstuostus, pīsadaleit viesturiskūs ceļuojumūs laikā i telpā, kai ari byut atkluojumu i puordzeivuojumu dalinīkim. Žurnals izīt 6 reizis godā. Kab atbaļsteitu žurnala byušonu ari iz prīšku, aicynojam abonēt. Jaunuokū žurnala numeri var nūpierkt (kai digitalā, tai taustomā veidā) ite: a12.lv.