Rokstu sagataveja: portals lakuga.lv

Sabīdreibys integracejis fonds (SIF) apstyprynuojs konkursa rezultatus Medeju atbolsta fonda (MAF) programā “Regionalūs, vītejūs i diasporys medeju atbolsta programa”. Nu Kulturys ministrejis budžeta daškiertūs leidzekļu programā apstyprynuoti 59 projekti, kurūs vydā ari diveji latgalīšu kulturys ziņu portala lakuga.lv projekti.

Latgalīšu kulturys ziņu portals lakuga.lv ituo gods MAF “Regionalūs, vītejūs i diasporys medeju atbolsta programys” projektu konkursā dabuojs atbolstu divejim portala īsnēgtajim projektim. Projekts “Latgaliskās kultūrtelpas dažādības, izaicinājumu un aktualitāšu atspoguļojums portālā lakuga.lv” (kūpejais finansiejums 34 325,78 eiro) ir svareigs atbolsts portala pastuoveigajai darbeibai, nūdrūsynojūt portala funkcejis, atbolstūt portala komandu i latgaliski viestejūt par latgaliskuos kulturys aktualitatem, procesim, cylvākim i nūtikšonom. Projektā planavuoti 63 roksti, kas papyldynuoti ar originalu foto saturu četruos rubrikuos – “Kruojuma duorgumi”, “Reportaža”, “Lakuga.lv vaicoj” i “Perosneiba. Pa latgalīšu pādim”. Skaiteituoju aptaujis, kai ari vaira nakai 250 socialūs teiklu īrokstu (tymā vydā ari video formatā).

Taipat atbolstu dabuojs projekts “Raidierakstu latgaliski sērija portālā lakuga.lv” (finansiejums 11 537,54, kurā planavuots taiseit pīcys da stuņdi garys raidīroksta epizodis, kurys papyldynuos roksti portalā lakuga.lv i vysmoz 25 socialūs teiklu īroksti, kai ari klauseituoju redzīņa nūskaidruošona par aktualajom temom, ekspertim, vaicuojumim i atgrīzeniskū saiti socialajūs teiklūs.

“Daškiertais finansiejums ļaus portalam turpynuot aizsuoktū dorba vierzīni, atsateisteit, radeit analitiskuoku saturu, intervēt personeibys, veiduot reportažys nu nūtykumu vītu i paplašynuot lūku ap muzejim, meklejūt kruojumu duorgumus. Tei ari ir vareiba papyldynuot daīmamū audio saturu latgaliski, dūdūt īspieju radeitū saturu izzynuot i saprast tim latgaliskuos kulturys interesentim, kuri grybātu, tok skaiteišona latgaliski saguodoj gryuteibys,” soka portala lakuga.lv i obeju projektu vadeituoja Amanda Anusāne.

Ar vysim ituo gods MAF projektu konkursā atbaļsteitajim projektim, kurūs vydā ari 17, kas viesteis ap temom, kas saisteitys ar Latgolu, var īpasazeit ITE.

Latgalīšu kulturys ziņu portals lakuga.lv vys vēļ ir vīneigais medejs Latvejā i pasaulī, kura saturs kasdīnā teik veiduots tikai latgalīšu rokstu volūdā. Portala skaiteituoji arviņ aicynuoti pasadaleit ar redzīni par portala dorbu, atteisteibys vierzīnim i latgaliskuos kulturyvidis paruodeišonu, aizpiļdūt portala skaiteituoju anketu ITE.