Rokstu sagataveja: portals lakuga.lv

Jezupa Pīguožņa Latvejis ainovu gleznīceibys konkurss ir kasgadeja, tradicionala nūtikšona. Itūgod bolvu padūšona nūtyka pavasarī Latvejis Dzeļžaceļa viesturis muzejā Reigā, tok konkursa izstuode turpynoj ceļuot pa vysu Latveju, i nu 15. novembra da 26. janvara byus apsaverama Daugovpiļs Nūvodpietnīceibys i muokslys muzejā (DNMM). Izstuodis atklauošona 15. novembrī 14.00 stuņdēs, viestej DNMM puorstuovi.

Konkurss ir veļteits vīnam nu izcyluokūs Latvejis ainovu gleznuotuoju – Jezupam Pīguožņam, kura dzymtuo puse ir Latgola. Kai īprīšk ir izasacejuse muokslys viesturneica Ingrīda Burāne, Jezupa Pīguožņa Latvejis ainovu gleznīceibys konkurss ir vīna nu plotuokajom gleznīceibys kūpskatem i ilglaiceiguokajom bolvom, iz kurū var preteņdēt sevkurs Latvejis muokslinīks. Itūgod konkurss nūtyka dasmytū reizi i puļcēja 108 muokslinīkus nu vysys Latvejis.

Izstuode aicynoj sevkuru pīdzeivuot ainovu jaunā gaismā – caur tuos formom, kruosom i nūkruosom. Voi tuos byutu saulis gaismys rūtalis iz dzydra azara viersa, voi smagneju muokuļu silueti, kas stuov iz horizonta, sevkura šaļts var tikt par dzejūli, kur doba i cylvāks sasateik.

Golvonajai bolvai tyka nomināti Ērikys Kumerovys, Jāņa Jākobsona, Visvalža Asara, Patricijis Brektis, Agnesis Kurzemniecis, Maijis Muižniecis, Justīnis Lūcis, Gunta Grants i Ilzis Smildzinis dorbi. Piec vysu pretendentu izviertiejuma žureja nūsprīde laureatu medaļu ītūgod padūt Ērikai Kumerovai par dorbu “Dziestošā diena”. Izstuode Daugovpiļs Nūvodpietnīceibys i muokslys muzejā byus apsaverama da 26. janvara.