Rokstu sagataveja: portals lakuga.lv

Pi skaiteituoju tics žurnala “A12” februara/marta numers, i tymā var puorskaiteit intervejis ar gaidomuos Latgalīšu kulturys goda bolvys “Boņuks 2024” ceremonejis vadeituoju Juoni Pampi, Daugovpiļs teatra akteri i režisoru Vadimu Bogdanovu, titula “Latvijas lepnums” sajiemieju Natāliju Rubīni i cytys sarunys i stuostus.

Žurnala “A12”, kas ir vīneigais žurnals, kas viestej par Latgolys ļaudim i jūs stuostim, redaktore Ināra Groce ituo numera īvodā soka: “Itymā žurnala numerī stuostom par atsagrīzšonu – par izalaseišonom, kas vysod ir myusu rūkuos. Par cylvākim, kurī māroj garus kilometrus, kab pīsadaleitu teatra mieginuojumūs, eistynuotu sapynus voi rostu sirdsmīru. Kam sirds ceļš bīži viņ ir ilgs i sarežgeits. Tys ir ceļš, kurā daudz kas palīk nasaprosts, kurā klaidys ir naizbāgamys, tok nu tūs vuicomēs.”

Žurnala “A12” februara/marta numerī skaitit īdvasmojūšus stuostus par Latgolys cylvākim, kurī īmīsoj spāku, rodūšumu i viesturis nūzeimi šudiņdīnys pasaulī:

• Atsagrīzšona i zalī horizonti – Marta Zvejsalniece doluos sajiutuos par sovu ceļu iz dzymtū Rogovku, kur jāgpylnai atteista dzymdynuotuoju aizsuoktū. Atsagrīzšona laukūs kai sūļs iz jaunys realitatis radeišonu i mierku sasnīgšonu;

• Sīvīte, kas maina viesturi – Antonina Bļuoduone (Antoņina Bļodone) tykuse par pyrmū sīvīti Latvejis NBS viesturē, kurei komandējuse militarū paruodi. Juos stuosts ir par naatlaideibu, Latgolys speitu i drūsmi lauzt stereotipus;

• Drūsme byut atkluotam – Daugovpiļs teatra akters i režisors Vadims Bogdanovs ar ironeju i osu pruotu caur sovim tālim socialajūs medejūs runoj par sabīdreibys pretrunom i politiku. Jis stuosta, kai muoksla paleidz saglobuot ciļvieceibu i deļkuo klusēt nav īspiejams;

• “Latvijas lepnums” nu Pelieču – Natālija Rubīne – ir pīdzeivuojuse represejis i izsyutejumu Sibirejā, apkūpuojuse stuostus par nūvadnīku dzeivi izsyutejumā i ar naatlaideibu eistynoj idejis sovys kūpīnys labkluojeibai;

• “Boņuka” ceremonejis vadeituojs Juoņs Pampe ir akters, radejis bolss i spūdra personeiba Latgolys kulturys vidē. Jis stuosta par sovu ceļu nu skotivis da radejis etera, kai ari par tū, kū nūzeimoj byut vīnam nu svareiguokuos latgalīšu kulturys bolvys pasuokuma vadeituojim.

Jaunuokajā žurnalā “A12” vysu rokstu vydā ari portala lakuga.lv redakcejis komandys taiseitī stuosti – portala redaktore Laura Melne sagatavejuse rokstus par Martu Zvejsalnieci, kai ari škārsteikla žurnala “Satori” rokstu i raidīrokstu sereju “Latgolys vaicuojums”. Taipat žurnalā puorskaitoma portala redakcejis sagataveituo informaceja par jaunuokajim gruomotu i muzykys īrokstu izdavumim.

Žurnals “A12” ir vareiba jau vaira nakai 10 godus izzynuot par dzeivi i ļaudim Latgolā i pasaulī, puorskaiteit dažaidus dzeivisstuostus, pīsadaleit viesturyskūs ceļuojumūs laikā i telpā, kai ari byut atkluojumu i puordzeivuojumu dalinīkim. Žurnals izīt 6 reizis godā. Kab atbaļsteitu žurnala byušonu ari iz prīšku, aicynojam abonēt. Jaunuokū žurnala numeri var nūpierkt (kai digitalā, tai taustomā veidā) ite: a12.lv.