Rokstu sagataveja: portals lakuga.lv

Itūnedeļ Latgolā teik svieteitys Pūdnīku dīnys, deļtuo itūreiz ar kulturys īsacejumim nedeļai pasadola latgalīšu muokslineica – gleznuotuoja i keramike Vēsma Ušpele. Jei kūpā ar veiru, pūdnīku Aivaru Ušpeli, saimnīkoj keramikys darbneicā “Malny Wylky” Rēzeknis nūvoda Maltys pogostā, sovūs dorbūs apvīnojūt muokslu, amatnīceibu i kulturys montuojumu. Piec Leldīnis aktivitatem i svieteišonys Vēsma īsoka izvādynuot golvu mīreigā pastaigā, sadareit koč kū taidu, kas jau seņ ir atlykts, kai ari naaizmierst par Pūdnīku dīnom veļteitūs pasuokumu apmekliejumu.

Izvādynuot golvu i sakuortuot dūmys

Taidam mierkam maņ cīši labi nūdar reita pastaigys. Bezmierkeigys pastaigys – aizīt i atīt. Īmūt vāruot dobu, dzierdēt dzeivys skanis i dūmuot tik par itū šaļti – byut ite i tagad.

Fiziskuo aktivitate

Munā gadīnī fiziskuo aktivitate ir fitness – molkys skaļdeišona. Tok kai fizisku aktivitati īsoku sakuortuot koč kū, kas jau seņ gaida tova laika. Tys var byut kaids plaukts, sātys pakss, lūgi, kartenis datorā. Kod sakuortoj kaidu vītu, pats palīc sakūptuoks. Ari piec padareita dorba vysmoz reizi nedeļā raugi palutynuot sevi, saimi i draugus – pagatavej koč kū gordu.

Apmeklej sabīdryskūs pasuokumus

Itūnedeļ ir daudzi pasuokumu, kas saisteiti ar munu darbeibu. Ar vairuokim pasuokumim itūgod teik svieteita Latgolys pūdnīku dīnu svātku 45. godadīna. Ari darbneicā “Malny Wylky” byus cepļa kūršona, sovpus 26. aprelī 13.00 stuņdēs Lūznovys muižā nūtiks Latgolys pūdnīku dīnu 2025 izstuodis atkluošona.