Rokstu sagataveja: portals lakuga.lv

Jau sastū reizi teik organizāta pusaudžu i jaunīšu nūmetne “Sūpluok”. Kotru reizi “Sūpluok” izalosa kaidu atškireibu nu īprīškejūs nūmetņu. Itūreiz “Sūpluok” nūtiks Adamovā, natuoli nu Kruoslovys, bet nūmetnis atslāga vuordi ir latgaliskais pīdzeivuojums animacejā i dobā. Nūmetne nūtiks nu 20. da 27. juļa, viestej organizatoru sagataveituo informaceja.

Pusaudžu i jaunīšu nūmetne “Sūpluok” pīduovoj 14–18 godu jaunīšim lītdereigi i izzynūši pietnīcyskuos darbeibuos pavadeit vīnu nedeļu gleznainā dobys vītā – Daugovys lūkūs, pi Adamovys dobys stygys. “Parosti nūmetne nūtyka Rēzeknis nūvoda Rogovkā, kurys tradicejom boguotuo vide paleidzēja nūmetnis organizatorim radeit naaizmierstamys šaļtenis. Tymā pošā laikā itys gods sūlejās byut eipašs, na tik partū, ka asam pamainejuši nūtikšonys vītu, bet ari partū, ka vaira uzaturēsim uorā, nūsadorbojūt ar izziņu, pietnīceibu i sportu, taidā veidā nūmetnis nūsaukums byus “Sūpluok dobā”,” viestej nūmetnis vadeituoja Ilga Šuplinska.

“Nūmetnis atslāga vuordi – latgaliskais pīdzeivuojums animacejā i dobā – ļaus atkluot sevi interaktivuos nūdarbēs, muzykā i poša identitatei svareiguos vierteibuos. Nūmetnis laikā runuosim par vierteibom i laiku, meklēsim īdviesmi dobā, izmontojūt ritiņus, supus, telts i lobu gorastuovūkli, īkuortuosim i izstaiguosim izdzeivuošonys stygys, veiduosim animaceju, pietejūt sovu vierteibu pasauli i apleicīni. Pīvīnuotuo vierteiba – respektēsim dažaidys volūdys, bet padzilinuoti izmontuosim taišni latgaliskū kodu i volūdu,” stuosta organizatori.

Komandā ir četri rodūši pedagogi: Ilga Šuplinska (animacejis satura, tekstu i viersrokstu, Latgolys kulinarejis i leksikys nūslāpumu atkluojieja), Evika Muizniece (multimuokslineica i žurnaliste – identitatis styprynuošona, rodūšī dorbi, sportiskais i deju azarts i nūdarbeibys), Kristaps Višs (muziks – muzyka, dzīsme, gitarspiele) i Juoņs Indāns (muokslinīks – animaceja, veiduošona, tehnologejis).

Dasaceit sovu daleibu nūmetnē var, aizpyldūt anketu ITE. Vaira informacejis par īprīškejom nūmetnem var vaicuot nūmetnis Facebook lopā ITE, papyldu vaicuojumu aizdūdami nūmetnis vadeituojai Ilgai Šuplinskai (ilga.suplinska@gmail.com, 26451355).