Rokstu sagataveja: portals lakuga.lv

Pīduovojam latgalīšu kulturys ziņu portala lakuga.lv skaiteituojim pavasara gola/vosorys suoku muzykys jaunumu izlasi ap albumim, kurūs tykuse kaida dzīsme latgaliski. Taipat mozs atguodynuojums, kur i kaidūs topūs i aptaujuos niu var atbaļsteit dzīsmis latgaliski.

Judins, Rancāne i zagiuze

Maja vydā treis dzīšmu mozalbumu “Rotā”, kas ir vīns nu diveju mozalbumu, gaidūt leluoka albuma izīšonu rudinī, izdevs etnodžeza duets “Stanislav Yudin & Asnate Rancāne”. Obeji muziki ir ari grupys “Tautumeitas” daleibnīki. Mozalbumā “Rotā” vydā ir treis kompozicejis, kas turpynoj dueta aizsuoktū ceļu – apvīnuot tautysdzīsmis i folkmuzyku ar breivu kontrabasa improvizaceju. Mozalbumā “Rotā” sūpluok dzīsmei “Rotā” i bulgaru “Bre Putrenko” skaņ dzīsme ari latgaliski – “Kiukuoja zagiuze uobelī”.

Jaunajā mozalbumā Judinam i Rancānei pīsavīnuojuši ari saksofonists Arvīds Kazlausks, pianists Edgars Cīrulis, sitaminstrumentalists Artis Orubs i vejūļnīks Aleksejs Bahirs, papyldynojūt albumu ar jaunom kruosom muzykā. Albuma izdeviejs ir “Jersika Records”.

“Rīmdari”, “Latgalīšu reps” i prīdis

Vosorys suokuos sovu pyrmū pylna garuma albumu ar 13 dzīsmem “No sirds” izdavuse Cāsu hiphopa apvīneiba “Rīmdari”, bet albuma gostu vydā ir ari cyti muokslinīki – Misters Krūmiņš, Baiba Bite, jauktais kors “Talsis” i ari “Latgalīšu reps”. Ar “Latgalīšu repu” apvīneiba kūpā īrakstejuse dzīsmi “Pāri priedēm”, kas albumā skaņ i latgaliski, i latvīšu literarajā volūdā.

Kai stuosta poša hiphopa apvīneiba, kas dorbojās jau pīcus godus, dūma par albumu bejuse jau seņ, bet da ituo saguojs izdūt atseviškys dzīsmis i sovulaik debitēt ar mozalbumu “REPMŪZIKA EP”. “Rīmdarūs” muzicej četri daleibnīki: Reinis Ragga, Brokss, Marshals i Krišs Baglais.

“Straume” i jauna “Rūženis” verseja

Juņa vydā sovu debejis albumu “Saules kāzas” izdavuse grupa “Straume”, kurā, kai soka poši grupys daleibnīki, godu symtim seneji tautysdzīšmu teksti sasateik ar jaunu, energetiski stypru muzykalū interpretaceju. Albumu papyldynoj latvīšim eipašys dzīsmis, kurys teik dzīduotys ar draugim pi gunkura i saimis sasatikšonys reizēs. Pi taidu dzīšmu var skaiteit ari vysā Latvejā labi zynomū latgalīšu dzīsmi “Auga, auga rūžeņa”, kurai grupa sataisejuse jaunu interpretaceju.

Grupa “Straume” rodusēs 2024. gods vydā, i jamā apsavīnuojuši muziki: Oskars Krūklis (basgitara), Niks Freimanis (klavīris), Nikolass Mūrnieks (bungys), Kārlis Neiburgs (gitara), Gustavs Jākobsons (saksofons) i dzīduotuoja Signija Miltiņa.

Atbaļsteit muzyku latgaliski

Itamā nedeļā tyka izziņuoti LTV1 raidejuma “Latvijas Sirdsdziesma” dzīšmu aptaujis finalisti i svātdiņ, 15. junī, Lelvuordē 15 dzīšmu vydā varēs dzierdēt i aicynojam atbaļsteit ari Andra Baltača i Daiņa Skuteļa dzīduotū “Latgalietis ir…”. Vaira par dzīsmi var izzynuot portala lakuga.lv rokstā ITE. Taipat itūšaļt, ka ir gribiešona, Latvejis Radejis 2 dzīšmu aptaujā “Muzikālā banka” vēļ arviņ var atbaļsteit grupys “Borowa Mc” jaunuokū dzīsmi “Mīļoj”, cerejūt, ka grupa ar jū varātu pīsadaleit aptaujis finala nūtikšonā Daugovpilī 2026. gods janvarī. Napaseņ radeja paviesteja, ka ar Daugovpiļs vaļstspiļsātu ir nūslāgts leigums, lai vēļ treis godus “Muzykaluos bankys” finals nūtyktu taišni tī. Bolsuot par “Mīļoj” var ITE. Bet radejā EHR “Latviešu hiti” var atbaļsteit grupys “Latgalīšu reps” singlu “Oh My God”. Tū var izdareit ITE.