Rokstu sagataveja: Amanda Anusāne/portals lakuga.lv

Kūkapstruodis uzjāmums nu Latgolys SIA “Lūsēni” ir vīns nu latgaliskuokūs Latvejā. Nūteikti daudzi jau ir pamanejuši, ka jī na tik ražoj kurynojamū materialu voi dieļus, tok ari aktivi komunicej ar sovim klientim, pīduovojūt jim vysaidys spēlis, aktivitatis i akcejis, kas jūs ir padarejuši kai radzamuokus, tai ari sirsneiguokus sabīdreibys acīs. Vīna nu apjūmeiguokūs aktivitašu, kurū reikoj “Lūsēni”, ir “Syltumčempis”, kas sastdiņ, 5. julī, Kuorsovā nūtyka ūtrū godu piec kuortys.

Uzjāmums itū nūtikšonu sauc par vyspasauļa granulu i brikešu sporta spēlem. Ka jau taids nūsaukums, tod ari aktivitatis i bolvu fonds taids pats. Itūreiz sporta spēlēs beja 16 disciplinys – pīcys sīvītem, pīcys veirīšim i sešys bārnim. I nūtikšona, i disciplinu nūsaukumi beja cīši latgaliski. Taipat organizatorim navar puormest izdūmys tryukumu – aktivitatis beja ari cīši interesantys, vysuos beja nazkas juodora ar briketem voi granulom. Par pīmāru, disciplinā “Pīpyut byudus” sīvītem, stuovūt kuojuos, izstīptom rūkom placu augstumā gar suonim juotur diveji granulu spani. Taipat bārnim disciplinā “Dašauņ guni” beja dūti pīci metīni, kur tenisa bumbeņa juotruopa pīcūs brikešu konteinerūs, kas nūlykti vysaidūs attuolumūs.

Kotrā disciplinā pyrmuos treis vītys varēja izalaseit, kaidu kurynojamū sajimt bolvā – granulys voi briketis. Pyrmajai vītai tei beja vīna palete, ūtrajai – puse paletis, tok trešuo vīta sajēme 1/3 paletis. Taipat vysa pasuokuma laikā beja vareiba atbiļdēt iz organizatoru sagataveitajim vaicuojumim i par pareizu atbiļdi sajimt vīnu īpakuojumu ar kurynojamū.

Uzjāmuma SIA “Lūsēni” vadeituojs Lauris Ļubka saceja tai: “Piec pārnejuo gods sporta spēlem, kuruos pīsadaleja vaira kai 400 dalinīku, mes ilgi dzeivuojom ar energeju, kū sajēmem nu cylvāku prīcys i syltajim vuordim. Mums eistyn pateik duovuot syltumu – i teišā, i puornastā nūzeimē. Itys pasuokums ir turpynuojums myusu gribiešonai īprīcynuot, īsaisteit i byut kūpā ar myusu kūpīnu. Es skaitu, ka itai tradicejai juoaug i juosaturpynoj!” Pasuokuma organizatori vēļ pasasmīdami dasoka, ka jau reitu suoks gataveitīs trešajam “Syltumčempim”, kam dorbs pi itaida pasuokuma ilgst vysu godu. Suokumā ir juoizviertej itys pasuokums, tod jau juodūmoj par cytu godu. “Naasu guliejs jau kaidu nedeļu. Ite vyss nūteik, pasasokūt cylvāku entuziasmam i gribiešonai paleidzēt. Nabeja lelu problemu dabuot breivpruoteigūs, kas grib īsasaisteit. Kūpā pi pasuokuma struodoj 37 cylvāki – tīsneši, kuorteibys uzturātuoji i cyti paleigi,” tai “Lūsēnu” darbinīks Viktors.

Iz sporta spēlem beja īsaroduse ari kupluo i sportiskuo Dzierkaļu saime, kas itūreiz beja napylnā sastuovā. Mārtiņš Dzierkals iz Saļnovu pi vacuokim rauga nūbraukt puora reizis godā, i vīna nu taidu reižu vysod ir Zīmyssvātki. “Vosorys ir muns breivlaiks, partū vysod pi pyrmuos vareibys es atbraucu iz itīni,” soka Mārtiņš, kurs “Syltumčempī” pīsadaleja pyrmū godu i dabuoja pyrmū vītu disciplinā “Skriejīņs piec syltuma”. Taipat lapnys smaids jūs sejā pasaruoda, kod vaicoju par jūs saimis sporta spēlem, kurys jī poši regulari organizej. “Prīca, ka itaida informaceja jau tykuse pi medeju. Mes atbraucem kai īsadvasmuot, tai ari pīsadaleit. Mes asam cīši sportiska saime, i mums pateik taidys saceņseibys. Tys ir breineigi kūpā tai pavadeit laiku i sovā vydā, i ar vysim puorejim. Capuri nūst “Lūsēniem”, ka itū vysu nūorganiziejuši,” tai Mārtiņš ar mamu Aiju. Ari mama ite ir pyrmū godu, tok cyti bārni “Syltumčempī” pīsadola jau atkuortuoti. “Pagaidom vēļ naasu bejuse nivīnā disciplinā, bet bārni jau mani gribēs nazkur īviļkt – īšu tī, kur byus pa spākam,” soka Aija. “Es ari padūmuošu, izīšu riņčī vysom disciplinom, apsavieršu, kas kur nūteik, tok vīnu jau nūsavieru – “Patus, patus paspīd”, kur guļus pozicejā juospīž granulu stīņs,” tai Mārtiņš.

Fotogalerejā atsavieršona iz “Syltumčempi 2025”. Foto: Amanda Anusāne/portals lakuga.lv