Roksta autore: Inta Marija Savicka, portals lakuga.lv

Latgalīšu volūda medeju telpā šudiņ skaņ daudzpuseigai i dzeivai. Tei vaira nav tik tradicejis simbols – latgaliski izasoka radejā, televizejā, laikrokstūs, socialajūs medejūs i vysaidūs projektūs. Volūda atsateista caur medeju projektim, kas sekmej tuos populariziešonu i reizē – sabīdreibys izgleituošonu i informiešonu.

Latgalīšu volūda medejūs nav tik simbols voi eksotika – tei ir īkļauta kai dabiska publiskuos dzeivis daļa, pasasokūt aktivom redakcejom, žurnalistim i projektim, kas ryupejās par satura radeišonu. Ari Sabīdreibys integracejis fonda (SIF) i Medeju atbolsta fonda (MAF) projekti paleidz radeit saturu latgaliski, veicynojūt informieteibu i sabīdreibys izpratni par Latgolys sovpateibom, kūpumā styprynojūt saiti ar volūdu.

Radeja i televizeja

Vīns nu aktivuokūs medeju, kas lītoj latgalīšu volūdu, ir radeja i televizeja. Volūda šudiņ skaņ na tik folklorys pasuokumūs voi eipašuos kulturys šaļtīs – tei ir stabila, dzeiva i daudzpuseiga daļa ari Sabīdryskajā medejā. I Latvejis Radeja, i Latgolys regionaluo televizeja (LRT) veidoj saturu latgaliski. Tei jau ir sistematiska prakse, na vaira tik simboliskys žests. Raidejumu veiduotuoji – žurnalisti, producenti, redaktori – na tik izsoka sovu pīdareibu Latgolai, tok ari struodoj, lai latgalīšu volūda palyktu par dabiskai sadzieržamu medeju telpys daļu.

Latvejis Radejis Latgolys studeja

Raidejumus latgaliski veidoj Latvejis Radejis Latgolys studeja. Vīns nu taidu ir “Kolnasāta”, kas stuosta par Latgolys kulturvidi, īsastuoj par regiona vierteibu i tradiceju saglobuošonu i atteisteibu. Taipoš raidejums īpazeistinoj ar īdvasmojūšom personeibom, kas saisteitys ar Latgolu i latgaliskū, atkluoj volūdys boguoteibu, īpazeist viesturi i kūpā ar klauseituojim turpynoj ceļu latgalīšu rokstu volūdā.

Latvejis Radejis Latgolys studeja kotru pīktdīni klauseituojim pīduovoj ari raidejumu “Latgolys stuņde”, kas izskaņ tik Latgolys apraidē. Tamā analitiskai teik izrunotys politiskuos, ekonomiskuos, socialuos i kulturys nūtikšonys, teik diskutāts ar amatpersonom, politikim, ekspertim, uzjiemiejim, sabīdryskim i kulturys darbinīkim i Latgolys dzeivuotuojim.

Byutyskai, ka arī cytūs raidejumūs, kas nav tik par Latgolu, vys bīžuok izskaņ frazis, intervejis i komentari latgaliski. Sabīdryskais medejs itamā ziņā ruoda pozitivu pīmāru – volūdu natulkoj voi nacenzej, bet ļaun pastuovēt tuos byuteibai.

Latgolys regionaluo televizeja

Latgolys regionaluo televizeja ir vīneigais televizejis medejs, kas sistematiski veidoj saturu ari latgaliski. LRT veidoj ziņu sižetus i reportažys par tematim, kurūs latgalīšu volūda nav ratums, bet izalaseišona. LRT pamatprincips ir veiduot viests par Latgolu – kai leluokom piļsātom, tai mozuokom vītom –, dokumentejūt kai ļaužu stuostus, tai nūtikšonys.

LRT žurnaliste Marta Puzāka skaidroj, ka vīns nu jūs svareiguokūs aizdavumu ir veiduot saturu i atteisteit projektus latgaliski. Latgaliskais saturs LRT ir cīši nūzeimeigs i ījam svareigu, pastuoveigu vītu kasdīnys dorbā, veidojūt kai ziņu sižetus, tai ari raidejumus. Bīži viņ kod sižetūs izskaņ latgalīšu volūda, cylvāki roksta pozitivus komentarus. Pīmāram, skateituojim, kas atsarūn uorpus Latgolys, uorzemēs, tys roda pateikamys sajiutys, nostaļgiskys emocejis. Taipoš ari sižeti, kas taiseiti latgaliski, īrostai sasnādz plašu auditorejis lūku. Cytu reizi skateituoji roksta, ka latgalīšu volūda varātu izskanēt bīžuok, tok tikpat daudz ir ari pretejūs redzīņu.

Marta ari pīmiņ, ka LRT aktivi īsasaista vysaidūs projektūs i arī tymūs koncentrejās iz latgaliskū saturu i volūdu. Tai, pīmāram, 2025. godā LRT eistynoj vairuokus projektus, kas apstyprynuoti nu SIF i MAF. Vīns nu taidu ir “Latgales pūra lāde – atdzimšana” – četru raidejumu cyklys par senejūs tradiceju īdzeivynuošonu, kulturys montuojuma atjaunuošonu i saglobuošonu Latgolā. Kotrā raidejumā tiks atspīgeļuoti pīmāri, kai senejuos tradicejis teik atjaunuotys i saglobuotys myusu dīnu vidē.

Volūda kai vierteiba

Latgalīšu volūda itymūs raidejumūs nateik izmontuota kai forma voi dekors. Tai ir strukturāts pamats. Tys paleidz runuot par aktualitatem sovā volūdā – bez kompromisu. Volūda styprynoj pīdareibu, identitati, lokalpatriotismu i sabīdryskū pošcīnu.

“Pi myusu Latgolā” – radejis žurnals, kas styprynoj latgalīšu volūdu i regiona identitati

Projekts “Pi myusu Latgolā”, kū eistynoj SIA “Divu krastu radio”, ir viesturiski i saturiski vierteigs medeju īguļdejums latgalīšu volūdys saglobuošonā, styprynuošonā i populariziešonā. Radejis žurnals latgalīšu rokstu volūdā, kū veidoj profesionali žurnalisti i satura redaktori, ir vīns no ratūs raidejumu, kas vysu saturu atskaņoj latgaliski.

Radejis žurnals “Pi myusu Latgolā” skaņ interveju, diskuseju i reportažu formatā. Tys reizē ir i informativs, i analitiskys – tī runoj par Latgolys kulturys aktualitatem, ekonomiskuos dzeivis tendencem, sabīdryskom izmaiņom i politiskim procesim, kurūs ir īsaisteiti Latgolys ļauds.

Dzeivuotuoju identitatis styprynuošona

Raidejums “Pi myusu Latgolā” na tik izkluosta faktus, bet veidoj platformu identitatis styprynuošanai. Kai Latgolā, tai uorpus tuos dzeivojūšī latgalīši var dzierdēt sev tyvus stuostus, ļauds, problemys i tūs rysynuojumus. Eipaši svareigi tys ir diasporai – raidejums ir daīmams ari digitalajā vidē – straumiešonys platformuos –, kas ļaun tam dzeivuot aiz radejis viļņu.

Drukuotī medeji

Izanalizejūt drukuotūs medejus, var sacynuot, ka saturam latgaliski eipaši lelys atpazeistameibys nav. Taidi medeji kai “Rēzeknes Vēstis”, “Latgales Laiks”, “A12”, “Ezerzeme” i “Vietējā Latgales Avīze” izlaiž rokstus i publikacejis latgaliski, bet vīnuota drukuota medeja, kas veiduotu saturu tik latgaliski, nav. Kūpumā jau pīmynātī laikroksti sovā darbeibā koncentrejās iz latvīšu literarū volūdu, bet viests izplota par Latgolu i aktualū regiona mārūgā.

Latgalīšu volūda medejūs atsateista

Nūslāgumā var saceit – latgalīšu volūda medeju telpā šudiņ ir dzeiva, aktuala i radzama. Tei ir pīdareibys, satura i kasdīnys informacejis nesieja. “Kolnasāta”, “Latgolys stuņde”, LRT sižeti, “Pi myusu Latgolā” i cyti eistynuotī SIF i MAF projekti Latgolys regionā aplīcynoj, ka latgalīšu rokstu volūda var pastuovēt sūpluok latvīšu literarajai volūdai, runuot par sabīdryski svareigom temom, veiduot kvalitativu žurnalistiku i uzrunuot plašu auditoreju. Mynātī i puorejī medeju projekti styprynoj na tik volūdu, bet ari ļaužu pošapziņu, identitati i saikni ar dzymtū zemi. Turpynojūt itūs ceļus i atbolstūt latgaliskuo satura veiduotuojus, mes saglobojam vītejuos kūpīnys sajiutu i boguotynojam kūpejū Latvejis kulturys mozaiku.