Rokstu sagataveja: portals lakuga.lv

Dzejis slams ir sovpateiga dzejnīku saceņseiba, kur sevkurs ir aicynuots izpiļdeit sovus originaldorbus auditorejis prīškā i skateituoju bolsuojums nūsoka itūs saceņseibu uzvarātuoju. Pavysam dreiži, 19. julī, 20.00 stuņdēs dzejis slama pasuokums gaidoms Rēzeknē, jaunuokajā piļsātys kulturtelpā “Līpuoja”, informej tuo organizatori.

Dzejis slams ir rodūša saceņseiba breivā gaisūtnē. Dalinīki uzastuoj ar sovim dzejis prīšknasumim, izmontojūt intonaceju, ritmu i emocejis, kab aizkustynuotu skateituojus i dagrīztu viereibu svareigajam. Kai pastreipoj pasuokuma organizatori, dzejis slams ir na tik dzejnīku, tok ari skateituoju nūtikšona – auditorejis īsaiste ir byutyska, skateituoji teik aicynuoti atbaļsteit autorus, izsokūt sovu viertiejumu skaitliskā veidā ar bolsuojumu.

Dzejis slamu Rēzeknis kulturtelpā “Līpuoja” vadeis pasuokuma organizatore Amanda Kaufmane, gitaru pīspielēs muziks Ēriks Ralfs Vanags. Daleibai slamā varēs dasasaceit pyrma pasuokuma, deļtam apmaklātuoji i dalinīki aicynuoti īsarast sovlaiceigai. Īīšona kai skateituojim, tai dalinīkim – 5 eiro, studentim i seniorim – 3 eiro, sovpus jaunīšim da 18 godu – īīšona bez moksys.

Amanda Kaufmane, stuosta, ka dzejis slami regulari nūteik Reigā, taipoš da šam ir bejuši Līpuojā, Limbažūs i cytur. Pa jai, ir cīši svareigi, ka taids pasuokums “izīt” regionūs. “Pādejuos nūtikšonuos Reigā vairuokys reizis ir izskanējuse dzeja ari latgaliski, tei vysod ir cīši atbaļsteita nu skateituoju pusis. Pādejā slamā ari uzvarēja meitine nu Leivuona – Elīza Lielpētere –, kura uzastuoja ar dzejūlim kai latvyski, tai latgaliski. Pa munam, Latgolā cylvāki mozuok beistuos, te ir leluoka energeja i atdeve. Es tikū gasteju Rēzeknē, sasapazynu ar kulturtelpys “Līpuoja” eipašnīku Fandango Fonteinu Kalitu i cytim cylvākim, nu kurūs dazynuoju, ka jau ir dalinīki, kuri plānoj pīsadaleit. Aicynoju sevkuru nasabeit i paraudzeit sovus spākus!”

Dzejis slama finalistus i uzvarātuoju nūsoka treis kuortuos, deļtam, kab pīsadaleitu slamā, ir juosagatavej treis dzejūli. Pyrmajā kuortā pīsadola na vaira kai 12 dalinīki, kur kotram prīšknasumam teik dūtys četrys minutys. Kotra slama finalistim byus vareiba pīsadaleit nacionalajā čempionatā, kurs nūtiks septembrī. Tuo uzvarātuojs dūsīs puorstuovēt Latveju Eiropys dzejis slamu čempionatā Berlīnē nu 16. da 18. oktobra.