Rokstu sagataveja: portals lakuga.lv

Latgolys regionaluo televizeja (LRT) itūvosor suoc jaunu raidejumu cyklu “Latgales pūra lāde – atdzimšana”. Pyrmū raidejumu par plūstuošonys tradiceju Daugovys lūkūs varēs vērtīs kanalā TV24 i Re:TV vierszemis apraidē 26. i 28. julī.

Projekts “Latgales pūra lāde – atdzimšana” viesteis par senejūs tradiceju īdzeivynuošonu, kulturys montuojuma atjaunuošonu i saglobuošonu Latgolā. Kotrā raidejumā tiks atspīgeļuots senejūs tradiceju atjaunuošonys process, tūs eistynuotuoji i izmontuošona myusu dīnu sabīdreibā, taipat ari skaidruots viesturyskais aspekts i perspektivys iz prīšku.  

Pyrmais raidejums byus par plūstuošonys tradiceju Daugovys lūkūs. Tei ir unikala tradiceja i pīdzeivuojums, kas apvīnoj dobys baudeišonu, viesturi i aktivū atpyutu. Ka myusu dīnuos plūstuošona ir vaira kai turysma aktivitate, tod nazkod plūsti tyka izmontuoti kai transports kūkmaterialu puorvoduošonai pa Daugovu.

Raidejumā plotuok varēs apsavērt naseņ Naujinis nūvodpietnīceibys muzejā sataiseitū Daugovys lūku maketu, kas sagloboj tūs reljefu, apdzeivuotys vītys i kulturys objektus. Viesturyski plūstus izmontuoja, kab nūguoduotu kūksni nu Latgolys mežu iz leluokom piļsātom i ūstom. Plūstnīku dorbs beja gryuts i beistams, tok tys palyka par nūzeimeigu daļu nu Latvejis upu transporta viesturis. Par tū vaira stuosteis Augšdaugovys nūvoda Kulturys i turysma puorvaļdis Turysma nūdalis vadeituojs Rolands Gradkovskis, kuram ari sovā ziņā ir saikne ar plūstuošonys tradicejom – juo vactāvs bejs plūstnīks.  

Ari myusu dīnuos turysma organizaceja – kempings “Daugavas lokos” pīduovoj plūstuošonys turis. Kempinga saiminīks Ilmārs Lociks stuosteis, kai niu plūstuošona ir atdzymuse kai turysma i kulturys pasuokums, eipaši Daugovys lūkūs, kas ir vīna nu skaistuokūs i ainavyskuokūs Daugovys daļu.

Projekta “Latgales pūra lāde – atdzimšana” mierkis ir sataiseit četrus televizejis raidejumus par četrom senejom tradicejom i tūs veidūlu myusu dīnu kulturā, turysmā i izklaidis jūmuos. Kotrā raidejumā tiks atspīgeļuoti pīmāri, kai senejuos tradicejis teik atjaunuotys myusu dīnu vidē – pīmāram, plūstuošonys tradiceju populariziešona Daugovys lūkūs, tradicionalūs iedīņu meistarklasis i tūs nūviertiejums Eiropys Savīneibys leiminī, taipat ari dzīduošonys tradiceju izzynuošona – teicieju apzynuošona i dzīšmu kruojumu veiduošona, kai ari vysaidu omotu prašmu meistarklasis. #SIF_MAF2025

Raidejumu “Latgales pūra lāde – atdzimšana” varēs vērtīs: sastdiņ, 26. julī, kanalā TV24 22.00 stuņdēs. Atkuortuojums – svātdiņ, 27. julī, kanalā TV24 14.30 i 20.30 stuņdēs. Piec kotra raidejuma puorraidis televizejā tūs varēs atrast LRT sātyslopā lrtv.lv, kai ari vītnēs Facebook, YouTube i platformā xtv.lv.

Raidejuma veiduotuoji gaideis ari jiusu atsauksmis i īsacejumus viestulēs pa postu, adrese: Rēzekne, Atbreivuošonys aleja 98, LV-4601 ar nūruodi Latgolys regionalajai televizejai voi LRT socialūs medeju lopuos, kai ari e-postā lrt.zinas@inbox.lv voi zvonūt/rokstūt iz tel. nr. 26339536.

Projektu finansej Medeju atbolsta fonds nu Latvejis vaļsts budžeta leidzekļu. Par raidejumu cykla “Latgales pūra lāde – atdzimšana” saturu atbiļd SIA “Latgales reģionālā televīzija”. #SIF_MAF2025

Publikaceju apmoksoj Latgolys regionaluo televizeja