Rokstu sagataveja: portals lakuga.lv

Pi skaiteituoju tics žurnala “A12” augusta/septembra numers, i tymā var puorskaiteit intervejis ar režisori Agnesi Laizāni, zyvu giušonys gidu Juoni Kupru, uzjiemieju Ievu Kudiņu i cytys sarunys i stuostus. Numers teik dasaceits kai nasteidzeiga skaitomvīla vosorys golam.

Žurnala “A12”, kas ir vīneigais žurnals, kas viestej par Latgolys ļaudim i jūs stuostim, redaktore Ināra Groce tuo īvodā roksta: “Myusu dīnuos vys bīžuok izskaņ aicynuojumi dagrīzt viereibu kūpīnys nūzeimei – eipaši uorpus piļsātu burzmys, mozuok apdzeivuotajūs regionūs. Dzeivuot pylnasneigai laukūs nav tik izaicynuojums, bet ari vareiba. Tī, kur ir darbeigi, atvārti cylvāki, dzymst optimisma pīsuotynuota gaisūtne, kas īdvasmoj ari cytus.”

Jaunajā žurnala “A12” numerī stuosti par cylvākim, vītom i dzierksti, kas uztur dzeiveibu Latgolā i plotuok:

• Režisore Agnese Laizāne atkluoj, kā atvierteiba i ziņkuoreiba paleidz īdegt idejis i pīpiļdeit sapynus.
• Kulturys darbinīks Harijs Vucins doluos puordūmuos par laikmeteiguos kulturys vītu regionūs, dorbu aiz skotivis i dzeivi ar muzyku.
• Uzjiemieja Ieva Kudiņa stuosta par aktivu dzeivi Leiksnā – storp saimi, mozajim veikalenim i bīdreibu, kur “dorot jiutīs dzeivs”.
• Kulturys solā Indrā – Olga Jokste, Ērika Zarovska i Ilona Kangizere ļaun īsavērt rūžu īdvasmuotuo cīma kasdīnā i puordūmuos par tū, kai puorsamej kūpīna piec školys sliegšonys.
• Zyvu giušonys gids Juoņs Kupra pastuosta pīcys atzinis par Rāznys azara nūslāpumim – par pludeņu taiseišonu, ilgtspieju i lelū lūmu.

Itymā numerī var atrast ari īlu nūsaukumu liktiņstuostus, muokslys sarunys ar Sergeju Djominu, geografa ritiņbraucieja pīdzeivuojumus i plotu izstuožu izlasi Latgolā.

Jaunuokajā žurnalā “A12” vysu rokstu vydā ari portala lakuga.lv redakcejis komandys taiseitī stuosti – portala redaktore Laura Melne ir autore rokstim par režisori Agnesi Laizāni i Ludzys Nūvodpietnīceibys muzeju. Taipat žurnalā puorskaitoma portala redakcejis sagataveituo informaceja par jaunuokajim gruomotu i muzykys īrokstu izdavumim.

Žurnals “A12” ir vareiba jau vaira nakai 10 godus izzynuot par dzeivi i ļaudim Latgolā i pasaulī, puorskaiteit dažaidus dzeivisstuostus, pīsadaleit viesturyskūs ceļuojumūs laikā i telpā, kai ari byut atkluojumu i puordzeivuojumu dalinīkim. Žurnals izīt 6 reizis godā. Kab atbaļsteitu žurnala byušonu ari iz prīšku, aicynojam abonēt. Jaunuokū žurnala numeri var nūpierkt (kai digitalā, tai taustomā veidā) ite: a12.lv.