Rokstu sagataveja: Anželika Litvinoviča/portals lakuga.lv

Gonreiž 1200 cylvāku Boltkrīvejā atsarūn aiz cītuma restem napamatuoti – partū, ka ir pret Lukašenko voi Putinu. Tī ir mīrmīleigī protestātuoji, opozicejis politiki i ari tī cylvāki, kas pīsekuoja kaidam Boltkrīvejis varys īstuožu redzīnī “napareizam”, aizlīgtam ziņu olūtam. Riezeknīts Dmitrijs Mihailovs tyka apcītynuots 2022. godā par pastuovūšuo režima kritiziešonu slāgtā interneta sarunu grupā. Ituo gods 19. junī jis tyka atbreivuots kūpā ar vēļ 13 politīslūdzeitajim, nu kurūs vyspazeistamuokais ir opozicejis liders Svjatlanys Cihanouskys veirs Sjarhejs. Dmitrijs Latgolys dzeivuotuojus aicynoj nabraukt iz kaimiņvaļsti i stuosta par teroru, kū saguojs pīdzeivuot, treis godus atsarūnūt Boltkrīvejis cītumā.

Saceja nabraukt iz Boltkrīveju

Jau nu 2018. gods Dmitrijam Minskā beja uzjāmums, kurū puorvaļdeja, bīži brauce iz Boltkrīvejis golvyspiļsātu. 2020. godā suocēs pandemeja – Boltkrīvejis varys īstuodis izalyka, ka tei naeksistej, partū vysi uzjāmumi turpynuoja struoduot kai īroksts. 2020. godā, jau pyrma vieliešonu, tū falsificiešonys i protestim Dmitrijam draugi saceja – “nabrauc tī, tu ar sovu raksturu, ar dzeišonūs piec taisneiguma i attīksmi pret Lukašenko eistyn tiksi kaidā nalaimē”. Tok jis brauce, i jam nataisneigi pīsprīde četrus godus cītumā. Jis tyka atbreivuots prīšklaiceigi, tok tys Boltkrīvejā ir ratums.

Boltkrīvejis Centraluo puorvaļde ceiņai ar nūzīdzeibu i korupceju ir golvonuo represeju i vardarbeibys īstuode vaļstī, kai stuosta Dmitrijs: “Es pats personeigi redzieju cylvākus, kurūs īnese munā kamerā, atbraucūt nu ituos puorvaļdis. Cylvāki beja tik brutali pīkauti, ka kuojis beja piļneibā zylys – nivīna kvadratcentimetra ar naskortu uodu. Es tim ļaudim devu pretsuopu leidzekļus, mes raudzejom dabuot smēris pret zylumim”. Dmitrijs nūruoda: “Itys ir cylvākim, kas dūmoj, ka jī brauc iz Boltkrīveju kai iz vaļsti ar garšeigim sīrenim. Esit gotovi – ka pi jums sarakstē ar dālu, par pīmāru, atrass karikaturu ar Lukašenko. Voi nazkū par karu Ukrainā sarakstē ar sīvu. Jiusu telefonu iz rūbeža var atjimt i vysu redzēt. Varbyut jius kai uorzemnīku nasiss da nuovei cītumā, tok ari tys nav fakts.”

Boltkrīvejis cītums – eļne eļnē

Dmitrijs atkluoj sovu skorbū pīredzi: “Jums ir juosaprūt, kas nūteik 21. godu symtā Eiropys centrā. Veritēs – tevi par nazkū apsyudz, tev pīsprīž cītumsūdu. Tu atbrauc iz cītumu, tev ir konkretu laiku juobyut tī. Tok cītumā ir konkreta sistema, sūdu sistema. Tei ir aptyvai taida – tev nav aizpūguota pūga, īt garum oficers, jis var pasaceit, ka tu puorkuop apgierba volkuošonys nūsacejumus. Voi, par pīmāru, vīnu dīnu naesi nūsaskivs, tev var pasaceit, ka naesi sasakūps. Sūds. Tev izroksta tai saucamū papeiru. Piec tam tevi izsauc iz komiseju i tī tev pīsprīž kaidu nūteiktu sūdu par tū, kū esi izdarejs. Sūdi var byut vysaidi – ruojīns, papyldu dorbi, tikšonuos reizis atjimšona ar tyvynīkim, tev var atjimt syutejumu, kai ari tevi var aizsyuteit iz sūda izolatoru. Tys ir kai cītums cītumā. Kod tu tī ībrauc – tu saprūti, ka cītums vēļ nav eļne. Tu īej eļnē, kū izgudruoja padūmu gulags. Tī vysim darbinīkim ir aizdavums eistyn izdareit spīdīni pret īslūdzeitajim. Tev vysu laiku vajag mozguot kameru i guoduot par teireibu tamā – nadūd Dīvs kaids atrass kaidu putekli. Naktī tu pryncypā guli iz kūka dieļa ar metala elementim – bez deča i jebkuo cyta. Iedīnī speciali nalīk suoļa, gaisma kamerā ir minimala. Tu piec 10 dīnom tamā vītā esi pazaudiejs godu sovys dzeivis. I pat tys vēļ nav trokuokais,” sovu pīredzi atkluoj Dmitrijs.

“Īsadūmojit, ka jums sūda izolatorā īdūd 10 dīnys. Tu siedi i kotru jaunu stuņdi nazyni, voi tev pagarynuos tū atsarasšonuos laiku vēļ par 10 dīnom voi nā. Kotra stuņde ir terors. Tu gaidi, ka atvērs mozū lūgu i saceis – paroksti papeiru, tev byus vēļ 10 dīnys ite. Tys nav ciļvieceigi. Labi vēļ, ka es eistyn zynuotu, ka maņ ite juobyut 10 dīnys. Es nazynu, kai itū izskaidruot civilizātam pasauļam,” soka bejušais politīslūdzeitais.

Jis ari stuosta par vierteibu sistemu Boltkrīvejis cītumūs: “Slapkova, kurs nūgalynuoja vasalu saimi, jis staigoj ar boltu birku i bīži viņ var sajimt maiguokus sūdus par puorkuopumim. Sovpus tev, kas ir sekuojs leidza kaidam opozicionaru Telegram kanalam, tu teic uzskateits par ekstremistu, teroristu. Kod siedi kolonejis prīšknīka prīškā, jis ar tevi var izdareit jebkū. Tī nav nikaidu nūsacejumu.”

Boltkrīvejā ir lobi celi – tikai, lai nūbrauktu iz cītumu

“Kod munejī riezeknīši rauga maņ īstuosteit – Dima, vyss jau tī ir kuorteibā, ir gordi sīreni i lobi celi. Es soku – esit tod gotovi pa tim lobajim celim aizbraukt iz cītumu. Es vysu stuostu, kū pats asu pīredziejs. I te nav kuo apsprīst.

Tamā vaļstī eksistej eļne eļnē. Vardarbeiba ir tik lela. Es tymā sūda izolatorā pa dīnu navarieju aizmigt, cytaiži maņ īdūtu papyldu 10 dīnnakts. Partū es vyslaik staiguoju prūm atpakaļ. Es varieju nūīt da 5000 kamerom. Es skaiteju. Es ap 18 kilometrim dīnā nūstaiguoju kamerā, kas piec izmāru ir kai padūmu vyrtuve. Jius sovā dzeivē eistyn itū gribit? Gribit sīreņus nūpierkt? Maizi nūpierkt? Labi, tok esit gotovi izīt cauri tam, kū asu pīredziejs es.

Es asu bejušais sportists, patstuoveigs nu agra vacuma, man redzīs, ka maņ ir taids nasalaužams latgalīša gors. Mani itei pīredze nasalauze. Tok maņ apleik beja desmitim cylvāku, kurim itys vysu dzeivi salauze. Jī ir fiziski i psihologiski sagrauti. Jī vysi nabeja naatlaideigi taisneiguma ceineituoji. Daži tikai najauši tī tyka, deļtam ka, par pīmāru, pīsekuoja kaidam “napareizam” ziņu olūtam. Privatā sarakstē izsaceja sovu redzīni. Esit gotovi, kod jius iz tīni braucit.”

“Ka maņ Minskā nabyutu sova cylvāka, kas koordinēja munus tyvuokūs i vede maņ syutejumus, es pazaudātu na 30 kilogramus, tok laikam 50 – kai Cihanouskis pazaudēja. Es sevi naturu ni par varūni, ni uperi. Es asu izguojs tū dzeivis vuiceibu, kas maņ bejuse vajadzeiga. Tok daudzi tū navar izturēt, i tys eistyn nav nikas taids, kam vajag izīt cauri. Latgolys dzeivuotuojim grybu pasaceit – mozuok ticit Boltkrīvejis propagandai. Boltkrīvejis cītumūs asūt taida populara fraze – mums cylvāka nabašnīku ir daudzi vīgļuok nūraksteit, kai myrušu dīnasta suni, mozuok papeiru juoaizpylda. Apsazynojit, ka taišni itai tī atsatīc pret cylvāku. Es pats da 2010. godam beju Putina fans, vierūs Krīvejis zinis. 2014. gods manī daudzi pamaineja. Es Rēzeknē dzieržu daudzi cylvāku, kurī runoj Krīvejis propagandys volūdā. Izmontoj tūs pošus vuordus. Es tūs asu pīsaklausejs jau cītumā, partū ka tī tik tū viņ ļaun vērtīs.”

Kas paleidzēja nasalyuzt?

Sarunys laikā Dmitrijs sevi pīruoda kai emocionali inteligentu i nūtureigu cylvāku. Kai jam izadeve izturēt treis godus Boltkrīvejis cītuma eļnē, saglobojūt dzeivisprīcu? Jis soka: “Nui, vysbīdejūšuokuos lītys, kū cylvāks sovā dzeivē var pīredzēt, es tī asu pīredziejs. Kod mani vede atbreivuot, es tū nazynuoju. Es gulieju iz buseņa greidys ar maisu iz golvys, ar rūku dzeļžim i beju puorlīcynuots, ka mani tiuleņ nūgalynuos. Tys, kas maņ paleidzēja ar vysu tikt golā, – es raudzeju izmontuot laiku, lai puordūmuotu sovu dzeivi i maineitūs. Es suoču dūmuot par tū, ka maņ sovai dzimtinei gribīs dūt nazkū vierteigu. Atguodoju vīnu reizi, kod tyku sūda izolatorā, maņ, saprūtams, nabeja kuo dareit. Tu vari tikai dūmuot par lītom. Ka tu dūmoj tikai par švakū, tu izneicynoj sevi. Maņ tamā reizē pruotā īguoja dūma – es īsadūmuoju, ka maņ ir miļjards eiro. Īsadūmuoju, kū es varātu dareit, lai atteisteitu sovu dzymtū Rēzekni. Kaidys ryupneicys iztaiseitu, sporta školys, teatrus, futbola laukumus. Dūmuoju par tū, kai vysi riezeknīši, kas aizbrauce iz uorzemem, grybātu atsagrīzt. Maņ pat tagad tū stuostūt uzamat zūsuoda – tys mani tūreiz tai īdvesmuoja. Izolatora darbinīki, kod atvēre lūdzeņu, īraudzeja, ka es smaidu. Jī sabļuove iz mane, tok es turpynuoju smaideit. Skaiteituoji var padūmuot, ka asu nanormals, bet taišni itys mani izgluobe nu sabrukšonys.”

Dmitrijs stuosta, ka otkonsasatikšona ar dzymtū piļsātu bejuse emocionala: “Es jau cītumā beju dūmuojs par tū, kai tys izavērs, kod mani izlaiss. Beju dūmuojs, ka ar reizi braukšu pi Rāznys azara – peļdiešūs, lai ari kaidi byutu laikapstuokli. Es cīši mīļoju Latgolu. Saguoja, ka mani izlaide dreižuok. Tok, atbraucūt iz Rēzekni, – es daudzi staiguoju pa īlom, syuteju vysaidus video sovim paziņom i draugim, kurī ite vaira nadzeivoj. Šaļtim ari vīnkuorši rauduoju.”