Roksta autore: Laura Spundere, portals lakuga.lv

Kaida ir myusu dīnu Latgolys amatnīceiba, voi tai ir sova struktura i kods? Ite i rokstu serejā iz prīšku raudzeisim dazynuot vairuoku myusu dīnu Latgolys amatnīku redzīņus, vaicuosim jim, voi myusu dīnu Latgolys amatnīceiba ir kvalitativa i konkurētspiejeiga, cik pīpraseita i myusdīneiga. Rokstu serejā iz amatnīceibu pasavērsim plotai – nu mūdis i dizaineru perspektivys, rūkdorbu prasmem i omotim, kuri tradicionalā izpratnē ir Latgolys amatnīceibys pamats. Itamā reizē raudzeisim dazynuot, kur i kai var nūpierkt Latgolys amatnīku dorbus, kaidi ir veikalu eipašnīku i pošu amatnīku leluokī izaicynuojumi.

Nūdrūsynuot kvalitati i daudzveideibu

Jaunuokais nu dizaina veikalu, kurs sovys durovys attaiseja tik pārņ, ir “Kabata” Rēzeknē, kur saimnīkoj Jolanta i Oskars Maculeviči, kuri ir ari “KUUP” kopeja radeituoji. Veikalam vys ir sava vadeituoja Liena Liepiņa, kura ari atbiļd par produkcejis īpierkšonu i daudzveideibu. Liena stuosta, ka veikala mierkis ir, kab sevkurs klients, naatkareigi nu vacuma i dzymuma, byutu spiejeigs atrast veikalā sovom vajadzeibom i mierkam atbylstūšu produktu. Deļtam teik apzynuoti aizpiļdeitys vairuokys produktu kategorejis, tūs vydā puortykys precis, tekstils, kosmetika, keramika, uodys izstruoduojumi, suveniri, taipoš ari precis, kas eipaši pīmāruotys bārnim, sīvītem voi veirīšim. “Itaida struktura paleidz radeit plotu pīduovuojumu, kurā var atrast kai praktiskys lītys, tai ari originalus rūku dorbus ar eipašu davīnuotū vierteibu,” doluos Liena. Vaicuota par jaunu sadarbeibys partneru atrasšonu, Liena skaidroj, ka, īpierkūt produkceju, teik īvāruoti vairuoki kritereji.

“Vysupyrma, viertejam kvalitati – kai izgataveišonys ryupeibu, tai izmontuotūs materialus. Pa ūtram, ir svareigs ari vizualais nūformiejums – pīviļceigs i gaumeigs īpakuojums ir eipaši byutyskys duovonu segmentā. Pa trešam, mums ir svareiga ari originalitate – kab produkts izacaltu i nastuovātu sūpluok jau asūšam pīduovuojumam ar leidzeigu izskotu voi ideju.”

Veikala “Kabata” pamata pīduovuojumu veidoj Latgolā ražuoti produkti, kas ir aptyvai 70 % nu vysa kluosta. “Mes gribim atbaļsteit vītejūs meistarus, saglobuot Latgolys amatnīceibys i ražuošonys tradicejis i paleidzēt itim produktim rast ceļu pi plotuokys auditorejis,” doluos Liena. Jei ari pastreipoj, ka klienti nūviertej kvalitati i jim ir svareigi, ka produkts nav daīmams lelveikalu kēdēs, tok ir nazkas unikals i cytaižuoks. “Pierkumi myusu veikalā palīk na tik par vīnkuoršu preci, tok ari par atmiņu voi simbolu, kas saistuos ar Latgolu.” Vystik Liena pīzeist, ka aizpiļdeit vysu veikala sortimentu tik ar Latgolys ražuojumim nabyutu īspiejams. Ir atseviškys produktu kategorejis, kurom regionā nav pīteikūši daudz ražuotuoju voi ari tī naspiej nūdrūsynuot pastuoveigus pīguodis apjūmus. Liena stuosta, ka ilgtermiņa mierkis ir turpynuot palelynuot uzsvoru taišni iz Latgolys produkceju i pīduovuot vēļ plotuoku preču sortimentu.

“Mes aktivi vaicojam piec jaunu sadarbeibys partneru i turom nūceju, ka dreizumā myusu veikala plauktūs byus vēļ vaira preču nu Latgolys,” tai Liena.

Sovpus, izvaicuota par leluokajim izaicynuojumim, kab pīpiļdeit veikala plauktus, Liena skaidroj, ka atrast vītejūs ražuotuojus nimoz nav tik vīgli. “Bīži viņ nav daīmama pylnvierteiga informaceja, nateik ari nūruodeits, ka produkts ražuots Latgolā voi ari ražuotuojam nav izveiduoti profili socialajūs medejūs, kas dūtu vareibu juo produktu atrast. Eipaši tys atsatīc iz vacuoka godu guojuma ļaudim, kuri, ka i roda kvalitativus i šmukus izstruoduojumus, gona bīži nagrib sasadorbuot ar veikalim, kam tys redzīs par sarežgeitu. Vēļ vīns byutyskys izaicynuojums ir amatnīku ražuošonys apjūmi. Daudzi amatnīki struodoj vīni, puordūd produktus tik tierdzeņūs i naspiej izgataveit produkceju pīteikūšā daudzumā, kab spātu nūdrūsynuot veikalu ar regularom pīguodem. Nareši amatnīkim produktu radeišona ir hobejs, na pamata nūsadorbuošona, deļtam itam dorbam napalīk daudz laika, sovpus veikalam ir nanūteikteiba,” doluos dizaina veikala “Kabata” vadeituoja Liena Liepiņa. Cyta storpā, jei darunoj, ka niu daļa amatnīku atsasoka sasadorbuot realizacejis veidā, kod samoksa teik sajimta tik piec preču puordūšonys. Koč ari tys ir vīns nu bīžuokūs sadarbeibys veidu i taida veida veikalu palīk arviņ vaira, amatnīkim i ari leluokim uzjāmumim ir bejuse nagativa pīredze ar nagūdpruoteigim tierguotuojim, deļtuo niu ražuotuoji sovys drūseibys deļ grib sajimt samoksu iz reizis.

Sovpus Latgolys zīmeļu daļā, Bolvūs, ir veikals “Azote”, kura sortimentā ari ir daīmami Latgolys amatnīku i ražuotuoju izstruoduojumi. Tuo puorstuove Maruta Castrova doluos, ka “Azote” vaira ir na veikals, tok amatnīku muokslinīku salons, kur vītejim meistarim ir vareiba padareit sovus dorbus radzamus plotuokai publikai. Maruta pastreipoj, ka sortimentā rauga piec vareibys īkļaut tūs produktus, kas radeiti taišni Zīmeļlatgolā i Latgolā kūpumā. Vystik jei ari pīzeist, ka tik ar dorbu puordūšonu nabyutu īspiejams nūpeļneit, deļtam taids veikals vaira ir sirds dorbs, na eistyns peļnis olūts.

“Azotē” regulari nūteik ari omotu meistaru darbneicys, taidā veidā ļaunūt kai vītejim, tai gostim īpazeit amatnīceibu jau padzilinuotuokā veidā, taisūt postolys, struodojūt ar muolu voi fiļcejūt. “Niu ražuotuoju vydā stypri populari ir palykuši vysaiduoki izstruoduojumi nu finera, kas, prūtams, nav švaki, tys ir moderni, vystik tys ari vaira nav rūku dorbs. Mums, par pīmāru, tryukst grūzu, byutu ļauds, kas lobpruot nūpierktu, bet pīduovuojuma nav,” tai Maruta. Taipoš kai “Kabatys” veikala vadeituoja Liena, ari Maruta pīzeist, ka precis pierk sezonali. Soltuokā laikā aktualuoki ir cymdi, zečis i skusti, sovpus syltuokā laikā cyti izstruoduojumi. “Cylvākim pateik kvalitativys lītys. Mums ir vītejais amatnīks, kurs struodoj ar uodu, jam ir kvalitativi uodys moki, kurus myusu klienti lobpruot īsaguodoj. Na mozuok svareigi ir ari puortykys izstruoduojumi, populars ir ražuotuoju nu Valmīrys gataveitais mads ar vysaidom garšom i ūgom, taipoš garšvīlys, ari “KUUP” kopejs. Vēļ gostim pateik pierkt produkceju ar vītejim logo voi attālim nu piļsātys voi nūvoda,” doluos Maruta. Salonā “Azote” lobu popularitati īmontuojuse ari Zīmeļlatgolys keramika, kuruos autoris ir Elita Eglīte i Lība Ločmele.

Tierdzeni, socialuos platformys i tīšuo puordūšona

Keramikys darbneica “Pīterkolns” aba meistare Dace Losāne par sovim dorbim soka, ka tys ir sajaukums storp tradicionalū i modernū. Dace pīzeist, ka juos pamata platforma ir socialī medeji Facebook i Instagram, kur jei regulari dalīk jaunys fotografejis ar pīduovuojumu i sajam pasyutejumus. Taipoš jei pīzeist, ka arviņ labi nūder tierdzeni – kai svareiguokūs jei pastreipoj Breivdobys muzeja kasgadejū rudiņa tiergu, taipoš ari Zīmyssvātku tierdzeņus, par pīmāru, svātku tierdzeņu Latgolys Kulturviesturis muzejā i amatnīku darbneicys “Kristāla kurpīte” tierdzeņu, kurū organizej cyta amatneica Zelma Pīguožne (Pīgožne) aba “Zelma Kraft”. Obeji pādejī nūsauktī tierdzeni ir Rēzeknē.

“Maņ pats svareiguokais byutu sataiseit sātyslopu, partū ka komunikaceja ar klientim aizjam cīši daudz laika, cylvākim ir daudz vaicuojumu par dorbim, tūs izmārim i cytu specifiku. Ka byutu sātyslopa, kur jau vysa informaceja par dorbu ir nūruodeita, byutu stypri vīnkuoršuok,” doluos “Pīterkolna” Dace.

Vēļ vīns gona plotu atpazeistameibu īmontuojs zeimyns ir “Leatherely” uodys izstruoduojumi, par pīmāru, moki, syksnys, aprūcis, i c. Tuo saiminīks Andris Ločmelis pastreipoj, ka juo dorbi teik ryupeigi gataveiti i pīlāguoti sevkura piercieja praseibom. Andris stuosta, ka jis vysuvaira izmontoj storptautyskū tierdznīceibys platformu etsy.com, caur kurū juo dorbus īsaguoduojuši ari ļauds nu Fraņcejis, Vuocejis, Lelbritanejis, Amerikys i cytu vaļstu. Taipoš labi struodojūt ari Instagram i Facebook platformys. “Produkcejis pīprasejums periodiski mainuos, tū gryuši paskaidruot. Cytreiz ir moku periods, cytreiz vaira pasyuta syksnys i tamleidzeigi. Gona bīži ir bejs tai, ka jauns pasyutejums atīt deļtam, ka cylvāks pi kaida cyta ir redziejs munus produktus,” stuosta Andris. Atškireibā nu keramikis Dacis, Andris soka, ka tierdzeni nav juo puordūšonys platforma. Tys aizjamūt puoruok daudz laika, ari nūbraukšona iz tierdzenim prosa sovus leidzekļus, attīceigi taiduos nūtikšonuos jis pīsadola reši.

Portala lakuga.lv skaiteituojumim vaicuojom, voi, pa jim, Latgolys amatnīceibys izstruoduojumi ir atpazeistami vysā Latvejā. Vairums aba 90,2 % pīzyna, ka ir atpazeistami.

Sovpus, vaicojūt, par tū, voi Latgolys amatnīceibai ir sovs zeimyns, dūmys jau dalejuos vaira, nakai pyrmajā vaicuojumā. Te drupeit vaira par pusi apvaicuotū atzyna, ka Latgolys amatnīceibai ir sovs zeimyns, sovpus 33,3 % skaita, ka vystik nav.

Skaiteituoju atbiļdis par tū, kaida veida amatnīceibys dorbi jim pateik vysuvaira, drupeit puorsteidze, aiz tuo, ka vystik bīžuok pījimts skaiteit, ka keramika ir Latgolā popularuokais amatnīceibys veids. Sovpus lakuga.lv skaiteituojim pi sirds vaira īt uodys izstruoduojumi.

Aicynojūt portala skaiteituojus nūsaukt kaidus laikmeteiguos amatnīceibys puorstuovus, tika sajimtys vairuokys atbiļdis. Tūs vydā vysubīžuok pasaruodeja keramikys meistari i darbneicys, kai “Pīterkolns”, “Cukrasāta”, taipoš ari keramikys darbneica “Jašas podi” i keramike Evija Maļkeviča-Grundele. Cytu atbiļžu vydā pasaruodeja uodys izstruoduojumu amatneica “Zelma Kraft”, apgierbu dizainere “VelgaCode”.