Nūdybynuota Juoņa Klīdzieja pīminis stipendeja
Rokstu sagataveja: portals lakuga.lv
“Dzeive mums īlīk vuordus mutē, dorbus rūkā i ūglis kryutežā,” reiz sacejs īvārojamais rakstnīks Juoņs Klīdziejs (1914–2000). Juo vuordi niu tiks pi jauna skaniejuma, kam “Vītolu fondā” dybynuota Juoņa Klīdzieja pīminis stipendeja, kab īdvasmuotu i atbaļsteitu jaunūs talantus, kurūs ceļš suocās leidzeigai – ar ticeibu vuordam, dorbam i sirdei, informej fonds. Stipendeja paradzāta studentim nu Rēzeknis piļsātys i nūvoda.
Juoņa Klīdzieja pīminis stipendeju dybynuojuse rakstnīka krystameita Ilze Sīlis, kura nazkod vuicejusēs Minsteris latvīšu gimnazejā Vuocejā, augstuokū izgleiteibu dabuojuse Stenfordys Universitatē i Džonsa Hopkinsa universitatē, veiduojuse veiksmeigu karjeru finanšu jūmā ASV, reizē aktivai dorbojūtīs latvīšu sabīdryskajā dzeivē vysā pasaulī. Aizvadeitajā godā Ilze kūpā ar veiru dybynuoja pyrmuos treis stipendejis dzymdynuotuoju Lienis i Teodora Sīļu pīmiņai i onkuļa Rūdolfa Sīļa pīmiņai.
“Muni celi ir guojuši tuoli nu dzymtuos zemis, tok es zynu, ka izgleiteiba ir nanūviertejama duovona. Ar itū stipendiju grybu, kab muna krysttāva Juoņa Klīdzieja dzeivis i dailradis gaisma īsadagtu jaunūs cylvākūs, kurim ir drūsme sapynuot i spāks sapynus pīpiļdeit,” skaita stipendejis dybynuotuoja Ilze Sīlis.
Juoņs Klīdziejs ir divdesmit pīcu prozys gruomotu autors, kuruos spūdrai izgaismuots dzymtais nūvods, ļaužu liktini i attīceibys, kai ari psihologiski smolkai atkluotys svešuma suopis. Popularitati jis dabuoja 1943. godā ar romanu “Jaunieši”. 1950. godā izceļuoja iz ASV, dzeivuoja Čikagā, bet nu 1953. gods – Kalifornejā, Napys līknē. Kalifornejis Universitatē dabuojs magistra gradu kliniskajā sociologejā (1957). Literarūs dorbus rakstejs i latgalīšu rokstu volūdā, i latvīšu literarajā volūdā, piec tūs motivu radeitys Juoņa Streiča kinys “Cylvāka bārns” i “Likteņdzirnas”.
Kai viesteits īprīšk, nūdybynuojumā “Vītolu fonds” jau ir vairuokys eipašys stipendejis studentim nu Latgolys, kai Zinaīdys Strods, Gunāra i Inārys Reiņu, Jura i Ritys Petričeku, Teodora i Rūdolfa Sīļu pīminis stipendejis, Rudzātu vydsškolys absolventu, Dakuļu saimis, Väino Keelmann i SIA “Kokpārstrāde 98” stipendejis. Latgalīšu volūdys i kulturys jūma eipaši izcalta Viktorijis Mickānis pīminis stipendejā, kas paradzāta Nautrānu vydsškolys absolventim – eipaši latgalīšu volūdys, viesturis i kulturys studentim, kai ari itūgod dybynuotajā Ingrīdys Turlajis stipendejā Ludzys jaunīšim, kuri ar lapnumu kūp i sagloboj latgaliskū kulturys montuojumu.
Breineigi. Prīca par taidim ļaudim i taidu saprasšonu. Na veļti Juoņs Klīdziejs ir rakstejs: “Ari mums, latvīšim, ir juoaizdūd sev vaicuojums – voi mes kai tauta, volūda, kultura – īejam voi aizejam?”