Rokstu sagataveja: portals lakuga.lv

Latgolys regionaluo televizeja (LRT) itūvosor aizsuokuse jauna raidejumu cykla “Latgales pūra lāde – atdzimšana” puorraidi. Nu jau ūtrū raidejumu, kas itūreiz veļteits klugu peišonys tradicejai Augšdaugovys nūvodā, varēs vērtīs 30. i 31. augustā kanalā TV24, kai ari 1. septembrī ReTV kanala vierszemis apraidē Latgolys regionalajā televizejā.

Projekts “Latgales pūra lāde – atdzimšana” viestej par senejūs tradiceju īdzeivynuošonu, kulturys montuojuma atjaunuošonu i saglobuošonu Latgolā. Kotrā raidejumā teik atspīgeļuots senejūs tradiceju atjaunuošonys process, tūs eistynuotuoji i izmontuošona myusu dīnu sabīdreibā, taipat ari skaidruots viesturyskais aspekts i perspektivys iz prīšku.  

Ūtrais raidejums byus par klugu peišonys tradiceju, kas ir vīns nu senejuokūs latvīšu omotu i sasaglobuojs da myusu dīnu kai eista kulturys boguoteiba.

Raidejums gasteis Augšdaugovys nūvoda Špogu tautys lītiškuos muokslys studejā “Pūpoli”, kur klugu piniejis jau vaira nakai 30 godu uztur itū tradiceju dzeivu – reikoj meistarklasis, atkluotuos darbneicys, pīsadola pasuokumūs i vīnkuorši sasateik, kab kūpā peitu grūzus, capuris, sūmenis, dekorus i cytus darynuojumus. Raidejums apmeklēs atkluotū darbneicu Dubnys pogostā, kur klugu piniejis jau īmeiļuojuši vītejī dzeivuotuoji, kuri izmontoj vareibu vuiceitīs peišonys prasmis. Taipat byus sasatikšona ar meistarem Špogu Muzykys i muokslys školā, kur īreikuota eipaša, omuleiga telpa meistardorbim. Tī reizi nedeļā puļcejās rūkdarbneicys, kab kūpā puorrunuotu peišonys daudzveideiguos tehnikys, pasadaleitu pīredzē i vīnkuorši kompanejā ļautūs nūmīrynūšam peišonys procesam.

Raidejumā varēs lobuok īpazeit ari ilggadejū studejis vadeituoju Maiju Kivlenieci, kurai peišonys prasmis i mīlesteiba īt nu babys. Tiks atkluots, kai itei senejuo tradiceja daboj jaunu elpu i otkon palīk aktuala ari myusu dīnuos.

Projekta “Latgales pūra lāde – atdzimšana” mierkis ir sataiseit četrus televizejis raidejumus par četrom senejom tradicejom i tūs veidūlu myusu dīnu kulturā, turysmā i izklaidis jūmuos. Kotrā raidejumā tiks atspīgeļuoti pīmāri, kai senejuos tradicejis teik atjaunuotys myusu dīnu vidē – pīmāram, plūstuošonys tradiceju populariziešona Daugovys lūkūs, tradicionalūs iedīņu meistarklasis i tūs nūviertiejums Eiropys Savīneibys leiminī, taipat ari dzīduošonys tradiceju izzynuošona – teicieju apzynuošona i dzīšmu kruojumu veiduošona, kai ari vysaidu omotu prašmu meistarklasis. #SIF_MAF2025

Raidejumu “Latgales pūra lāde – atdzimšana” varēs vērtīs: sastdiņ, 30. augustā, kanalā TV24 22.00 stuņdēs. Atkuortuojums – svātdiņ, 31. augustā, kanalā TV24 14.30 i 20.30 stuņdēs. Svātdiņ, 1. septembrī, 17.30 stuņdēs raidejumu varēs vērtīs ari ReTV vierszemis apraidē. Piec kotra raidejuma puorraidis televizejā tūs varēs atrast LRT sātyslopā lrtv.lv, kai ari vītnēs Facebook, YouTube i platformā xtv.lv.

Raidejuma veiduotuoji gaideis ari jiusu atsauksmis i īsacejumus viestulēs pa postu, adrese: Rēzekne, Atbreivuošonys aleja 98, LV-4601 ar nūruodi Latgolys regionalajai televizejai voi LRT socialūs medeju lopuos, kai ari e-postā lrt.zinas@inbox.lv voi zvonūt/rokstūt iz tel. nr. 26339536.

Projektu finansej Medeju atbolsta fonds nu Latvejis vaļsts budžeta leidzekļu. Par raidejumu cykla “Latgales pūra lāde – atdzimšana” saturu atbiļd SIA “Latgales reģionālā televīzija”. #SIF_MAF2025

Publikaceju apmoksoj Latgolys regionaluo televizeja