Kulturys īsacejumi nedeļai: atkluot Zīmeļlatgolys pērlis
Rokstu sagataveja: portals lakuga.lv
Itamā nedeļā par kulturys īsacejumim guoduojs īrokstu studejis “Bigmaar’s Records” saiminīks i grupys “Unknown artist” solists Māris Keišs. Jis aicynoj drupeit nūstuot steigā i atkluot vairuokys Zīmeļlatgolys pērlis.
Viļakys Vysusvātuos Jezus Sirds Romys katuoļu bazneica (aba tautā saukta par “Neogotikys rūzi”)
Skaistuokais arhitekturys pīmineklis Zīmeļlatgolā ar boguotu viesturi. Vārts apsavērt ari tim, kuri navar izlemt, iz kura oltora fona grybātūs precētīs – vysudreižuok izavēlēsit itū. Ir vareiba dasaceit ekskurseju, kuru voda vītejuos draudzis vīdais prīsters Guntars Skutels (jis ir progresivs prīsters, jam ari iRobota putekļu syuciejs braukoj pa bazneicu). Vaira informacejis ITE.
Abrenes ustobas aba privatekspoziceja “Abrenes istabas”
Tīpat natuoli nu bazneicys ir vīta, kur apsavērt, kuo cylvāki dzeivuoja nazkod Latvejai i Latgolai pīdarūšajā teritorejā. Ir svareigi zynuot i saprast tū, kas i deļkuo tuo nūtyka, ka mums beja juoatdūd sovu zemi svešim. Vaira informacejis ITE.
Gleznuošona “Kadiķūguos”
Ir sasakruojs daudz emoceju par nedeļu? Juos vysys vari izlikt, izkruosuot, izzeimuot un izmuozuot pa molbertu “Kadiķūguos”, Baļtinovā. Gaiša atmosfera, gaišys dūmys i gaišs padūmdeviejs. Kuo ari ir īspiejams nakšņuot. Vaira informacejis ITE.
“Upītes Uobeļduorzs”
Ka esi izdūmuojs palikt pa nakti “Kadiķūguos” leidz 20. septembrim, tod vari nūbraukt pasaklauseit vacuokū latgalīšu aiļu i dzīšmu festivalu “Upītes Uobeļduorzs”. Šūgod uzastuos: Daugovpiļs tymsi zylais kors, “Čipsis un Dullais”, etnogrupa “Ogas”, “Latgales klezmeri”, FK “Upīte” i daudzi cyti. Ailis skaiteis Annele Slišāne, Mārīte Slišāne, Valdis Vucāns, Ineta Atpile-Jugane un cyti. Beleti daīmami ITE. Pasuokuma dīnā iz vītys tī moksoj 15 eiro, īprīškpuordūšonā – 10 eiro.
