Dzejūļu autors: mygluojs

Pīduovojam skaiteituojim latgalīšu dzejnīka i performancis muokslinīka mygluoja dzejūļus. Par tim jis roksta tai: “Par speiti cylvāku protestim pret mežu izgrīzšonu, par speiti Satversmis tīsys lāmumam, ka īprīškejī grūzejumi par leluoku kūku daudzuma izciersšonu naatbylst Satversmei, Zemkūpeibys ministreja gatavej jaunus plānus vēļ intensivuokai mežu izciersšonai. Jau niule teik calta trauksme, ka mežsaimnīceibys nūzare Latvejā ir palykuse par emiseju olūtu, koč īprīšk meži beja nūzeimeigs emiseju izkruošonys veids, i tys puorsvorā ir saisteits ar palelynuotū izciersšonys daudzumu. Tuo vītā, kab saglobuotu (vēļ koč cik atlykušū) biologiskū boguoteibu, zemkūpeibys ministris rauga atsakrateit, ka “izmainis saisteitys ar ilgtermiņa klimata praseibom”, it kai klimata puormainis nav jau nūteikūšys, vēļ naskar Latveju i mes asam atkluojuši magisku veidu, kai mežu izciersšonu nu emiseju olūta puorvērst par dobys aizsardzeibys leidzekli.”

nacionaluos ciervkūpeibys asociacejuos
bīdru pīsaistis akcejuos
izsoka aicynuojumu īt medeit mežā
i puornest vysmoz kuotus
kab jaunuo audze naīsadrūsynoj pamest nūzari

Ūzūleni, ūzūleni
Tovu lelu rasnumeņu
Byus nu kuo Ikeai
Ūzulkūka gultys cierst(i)

konkursa uzvarātuojim golvonajā bolvā paduovynuos īspieju kūpā ar vidis aizmiersteibys i regionaluos at(pisies tu no manis cik jau var sponsorēt laukus tu neredzi cik man te Rīgā dzīve grūta) ministrejis puorstuovim svineigi puorgrīzt poliestera prīveitis nacionalys nūzeimis aizsorguojamu kailcieršu atkluošonā

Ūzūleni, ūzūleni
Tovu lelu kuplumeņu
Byus mums kū iz Boltkrīveju
Syltumam(i) eksportēt(i)

sadadzynuotys zemis taktikys īvīsšonys departaments ir izpietejs ka Satversmis tīsys lāmumi ir diskreditiejami jo kam maņ juosaklausa instituceja kas atbolsta geišys lesbīšus i naatkodejamys personys cikom poša tīseibys iz akrila [izskatās kā vilna! Pirkt ŠEIT] iuzeņom i ryupnīcyskom vylnainem kū satur šmukuokuos natradicionalūs mazglūs sasītys poliestera prīveitis nūlīdz pat tautīši gruomotsejnīceibys sātyslopuos

Ūzūleni, ūzūleni
Tovu lelu dyžanumu
Steidzās zuodžēt LVMs(i)
Pyrms tu asi nūmiereits(i)

zemis lītuojuma eksperti kasgadejā vuovuļuojūšūs organizaceju kongresā ir prīceigi ziņuot ka mežu daudzums Latvejā sasogloboj namaineigs inovativu tehnologisku uzturiešonys sistemu deļ kai pīmāram zam definicejis kūpts mežs var sasaglobuot zemisgoboli naatkareigai nu kūku daudzuma kam golvanais kriterejs ir pīdareiba pareizajai vaļsts mežizsaimnīceibys īstuodei i vyslobuokajai zemis lītuojuma kategorejai planavuošonys registrā

Ūzūleni, ūzūleni
Tovu lelu vacumeņu
Es pīdzymu tev atrodu
Es nūmieršu tu nūmiersi
Paliks viņ poliestera prīveitis
Da i kuru tys uztrauc
Ka tik Latvejā darynuotys
Ka tik Latvejā apglobuotys

ornitologi syt trauksmi pavasarī taišni iz lendīni taišni iz putynu dzeišonys laiku ka kūku grīzšonai nav juonūteik jūs lygzduošonys periodā tok troks tu naesi deļkam tu tai bauroj redz tu tai klīdzi ka sakareigajim mežu biznesu vadeituojim nav cytys izvielis kai pīleidzynuot tevi trokam hipijam tok nūsamīrej tok siedi sātā ka napateik to nasaver i vyspuor nūpierc pats sev meža gobolu kas tev aizlīdz izceļt muojeņu apsīt ar vylnys audeni ci celaini (bonusa punkti ka pats asi audiejs) i sorguotīs nu garum braucūšim harvesterim

Saeimit(i) Juoņa bārni leigū leigū
Zam tom vysom kailom ciertem leigū leigū
Zam tom vysom kailom ciertem leigū leigū
Tī Juoneiša gūda vīta leigū leigū
Zam tom vysom kailom ciertem leigū leigūūūūūūūūūūūūūūūūūūūūūūūūū