Rokstu sagataveja: portals lakuga.lv

Kulturys īsacejumus itai nedeļai sagatavejuse folklorys kūpys “Ceidari” vadeituoja Marta Sīle. Jei īsoka napalaist garum “Ceidaru” koncertu Ulbrokā, īspēt ari iz Rudynuoju festivalu Kotlakolnā, kai ari nūbraukt gostūs pi malenīšu.

Eiropys Folklorys dīnys koncerts “Upes pērles” Ulbrokā

Jau trešū reizi Eiropys folklorys dīnys koncerts “Upes pērles” (itūgod 20. septembrī) aicynoj īpazeit i baudeit breineigus Latvejis i cytu zemu folklorys grupu prīšknasumus. Tradiceju daudzveideiba i zynuošonuos baļsteits snāgums – lītys, kas raksturoj koncerta daleibnīkus.

Koncertā pīsadola latgalīšu kulturys kusteibys “Volūda” folklorys kūpa “Ceidari”, saimu folklorys studeja “Garataka”, muzykaluo dūmubīdru grupa – projekts “The Baltic Sisters” i Dīnavyditālejis muzykys tradiceju kūpieji “Quartetto Areasud”.

Rudynuoji Kotlakolnā

Itymā nedeļgolā nūtiks tradicionalais Rudynuoju festivals. 20. septembrī 17 stuņdēs festivala atkluošona pie Kotlakolna tautys noma. Ar guņs vāzom daleibnīki īs iz Saulīšu piļskolnu, kur nūtiks Rudynuoju rituals, bet 20 stuņdēs tautys nomā byus “Rudynuoju dzeiris”. 21. septembrī 11 stuņdēs – festivala daleibnīku koncerts Ražys tiergā Kekovā. Festivalā pīsadaleis folklorys kūpys nu vysys Latvejis i draugi nu Leitovys.

Jaunlaicinis muižys muzejs “Malenīša pasauļs”

Olyuksnys nūvodam rakstureiga eipaša kultura i maleniskuo identitate. Tī ļauds ir sirsneigi i jiusmeigi i nazkod gaismu ustobā nese ar maisim. Malenīši sīnu kosa, na gruob, buļbis laupa, na myzoj, bet molku grīž, na zuogej. Malenīši, taipat kai latgalīši, globoj, kūp i gūdā ceļ sovu volūdu.

Breineiga vīta kur sajust malenīšu tradicejis i byuteibu ir Jaunlaicinis muižys muzejs. Tī ar prīcu i humoru var izzynuot kū jaunu par malenīšim i ari pošam par sevi.