Vuicūs volūdu tik tod, ka mīļoju tuos tautu. Saruna ar japuoni Naokiju Vatanabi
Roksta autore: Amanda Anusāne/portals lakuga.lv
Naokijs Vatanabe (Naoki Watanabe) ir 28 godus jauns japuoņs, kurs dzeivoj Saitamys apleicīnē, kas atsarūn natuoli nu Tokejis. Jam kuldā ir treis magistra grādi i 15 volūdys, vīna nu tūs – latgalīšu volūda. Taipat Naokijs runoj ari latvyski i lībiski. Leluokuo daļa nu volūdu, kuruos jis puorzynoj, ir mozuok lītuotuos volūdys. Par volūdys vuiceišonūs Naokijs soka tai: “Es vuicūs volūdu tik tod, ka mīļoju tuos tautu.”
Par Naokiju es izzynuoju nu Viļānu vydsškolys 20. augusta Facebook īroksta, kurā beja īlyktys kartenis ar školys direktori, absolventem i Naokiju ar taidu aprokstu: “Šudiņ školā gasteja Naokijs Vatanabe, kas atbraucs nu Japuonys, kab izzynuotu Latvejis viesturi i kulturu, parunuotu latvyski i latgaliski. Eistyn beja prīca dzierdēt, kai cylvāks nu Japuonys runoj latgaliski.” Kod sasazynuoju ar školys absolventem i školuotuoju Anitu, kab izzynuotu vaira par Naokiju, saprotu, ka puiss ir cīši interesanta personeiba i grybu jū nūintervēt. Napaspieju Naokiju nūgiut Latgolā, tok jis atroda breivu šaļti i klusuoku Reigys kopejneicu, kab mes sasazvaneitu videozvonā.
Koč i Naokijs suokumā uzatrauce par sovom latgalīšu volūdys zynuošonom i pyrma sarunys rakstiski breidynuoja, ka jis vēļ tik vuicuos latgalīšu volūdu, mes gondreiž symtprocenteigai runuojom latgalīšu volūdā. Tik puora reižu puortulkuoju kaidu sovu vaicuojumu angliski. Pīduovoju tev īsaklauseit myusu sarunā, kurā vaira izzynuosi par juo aizaraušonu ar volūdom, dorba mekliejumim Latvejā i jū pošu kai personeibu.
Saruna nūteik 31. augustā. Treis reizis raugom sasazvaneit i beidzūt tys izadūd! Sasavasaloju, pabreidynoju, ka sarunu īraksteišu, i suocu aizdūt vaicuojumus.
Amanda: Nu, stuosti, cik labi tu mani saprūti? Cik daudz tu pats vyspuor runoj latgaliski? Voi mes varim turpynuot sarunu latgaliski? Voi es varu puortulkuot angliski tik tod, kod tu nazkū nasaprassi?
Naokijs: Saprotu!
Amanda: Tod varim runuot latgaliski?
Naokijs: Es latgalīšu volūdu vēļ vuicūs. Es nasaceitu, ka labi runoju latgaliski, partū, ka tei ir cīši sarežgeita volūda.
Amanda: Labi, bet cik daudz tu zyni – tei ir sarunvolūda voi tik puors frazis? Voi tu saprūti vysu, bet pats navari izasaceit?
Naokijs: Es saprūtu, kū cyti soka, jo es asocieju ar latvīšu volūdu. Taipat es zynu boltkrīvu volūdu, i latgalīšu volūda ir nazkas storp latvīšu i boltkrīvu.
Amanda: Tev redzīs, ka ituos volūdys ir leidzeigys?
Naokijs: Nui, nui!
Amanda: (Uzskaitu.) Latgalīšu, boltkrīvu, latvīšu… Cik volūdys tu vyspuor zyni?
Naokijs: Nu, breivi es runoju tik japuoņu, angļu i ungaru volūdā.
Amanda: Labi, maņ nav vaicuojumu par angļu i japuoņu, tok parkū ungaru volūdu tu puorzynoj tik labi?
Naokijs: Es suoču vuiceitīs ungaru volūdu, kod maņ beja 12 godu. Niu maņ ir 28 godi. Saīt, ka jau 16 godu vuicūs itū volūdu. Vuicejūs nu gruomotu i internetā. Taipat divejis reizis asu dzeivuojs Ungarejā.
Amanda: Tev pateik tei volūda, pateik vaļsts, voi deļkuo taišni ungaru volūda ir tei, kurū tu vuicejīs?
Naokijs: Maņ pateik Ungarejis viesture i kultura.
Amanda: Cik ilgi tu dzeivuoji Ungarejā?
Naokijs: Kūpā saīt diveji godi.
Amanda: Kaidys volūdys tu vēļ zyni voi esi vuicejīs?
Naokijs: Es varu drupeit runuot boltkrīviski, latvyski, igauniski, kalmiski, gvaraniski, komiski, mandžuriski. Muoku ari latgalīšu, pryušu, lībīšu, erzju i Krimys tataru volūdys. Latgalīšu volūdu es nasavuiceju formali. Maņ ir interese, partū, ka maņ pateik Latgolys kulturviesture i volūda ir leidzeiga boltkrīvu i latvīšu.
Amanda: Parkū taišni itaidys volūdys? Tymā skaitā vairuokys mozuok lītuotuos volūdys. Parkū nasavuiceji kaidu spāņu, fraņču voi cytys, kuruos runoj vairuoki miļjoni cylvāku i kurys vaira varātu nūderēt, par pīmāru, dorba tiergā?
Naokijs: Partū, ka es vuicūs volūdu tik tod, ka es mīļoju tū tautu. Vysvaira maņ pateik uralīšu i baltu volūdys. I nu baltu volūdu muna pyrmuo volūda, kurū suoču vuiceitīs, beja senejūs pryušu volūda. Latvīšu volūdu es suoču vuiceitīs 2022. godā, jo tūlaik kai magistra students dzeivuoju Igaunejā i gribieju nūbraukt iz Latveju.
Amanda: Saīt, lai tu nūbrauktu iz Latveju, tev beja svareigi runuot latvyski?
Naokijs: Nui! Latvīšu volūdu es zynu lobuok nakai latgalīšu.
Amanda: Maņ jau ruodīs, ka tu cīši labi runoj latgaliski!
Naokijs: Nā! Muna latvīšu volūda ir slykta, bet muna latgalīšu volūda ir švaka! (Smejās.)
Amanda: Cik saprūtu, tev ari ir draugs, kurs īt nu Latgolys. Voi jis ari runoj latgaliski?
Naokijs: Nui, maņ ir latgalīšu draugi! Naseņ beju pi vīna drauga Dvītē. Jis gon pats narunoj latgaliski, bet juo mama runoj.
Amanda: Tod saīt, ka Latgolā tev saguoja ari parunuot latgaliski?
Naokijs: Nui, es runuoju i latgaliski, i boltkrīvyski.
Amanda: Varbyut tu vari ari pasaceit sovu motivaceju, par kū tu vuicejīs boltkrīvu volūdu?
Naokijs: Boltkrīvu volūdu suoču vuiceitīs padsmit godūs, kod munā gimnazejā Japuonā vuicejuos boltkrīvīte i es jimā īsamīļuoju.
Amanda: Jums niu ir attīceibys?
Naokijs: Nā, jei nabeja muna meitene, es vīnkuorši beju jamā sasamīļuojs. Ar jū es runuoju boltkrīvyski. Taipat vīnu reizi asu bejs ari Boltkrīvejā. Pyrma puora nedeļu beju Viļņā – tī ir daudzi boltkrīvu. Tī maņ ari saguoja parunuot boltkrīvyski.
Amanda: Puorejūt pi latgalīšu volūdys – tu saceji, ka tū īsavuiceji internetā!
Naokijs: Nui, pats vuicejūs internetā!
Amanda: Tai kai tei nav leluo volūda, cik vīgli voi gryuši tev beja atrast materialus, nu kurūs vuiceitīs?
Naokijs: Ā, nu vēļ maņ ir paziņa latgalīte, kura dzeivoj Amerikā, Teksasā. Slovona muzykante Aija Īzāka. Daudzus godus es jai praseju paleidzeibu volūdys apgiušonā. Nu suoku maņ nabeja plāna vuiceitīs latgalīšu volūdu. Tys beja 2017. voi 2018. gods, kod nu baltu volūdu saimis tik senejūs pryušu volūdu gribieju īsavuiceit, tok 2022. godā kai suoku vuiceitīs latvīšu, tai izdūmuoju, ka vajag ari lībīšu i latgalīšu volūdu, jo Latvejā ir treis volūdys – latvīšu, lībīšu i latgalīšu. Es vuicūs vysys treis. Lībīšu zynu drupeit švakuok. Saprūtu, jo zynu latvīšu i igauņu, bet runuot i raksteit švakuok prūtu.
Amanda: Breineigi. Maņ ruodīs tu esi vīns nu ratūs cylvāku, kurs zyna ituos vysys treis volūdys. Bet cik tod vīgli tev beja īsavuiceit? Voi tu runuoji ar draugim, meklieji kaidus video, materialus, gruomotys, dorba lopys?
Naokijs: Nu suokuma daudzus godus es vaicuoju paleidzeibu tik Aijai, bet niu maņ ir ari vairuoki latgalīšu draugi. Kod vajag paleidzeibys, vaicoju jim. Tok tai, kai naseņ pasaruodeja Google Translate, tod izmontoju tū. Aija saceja, ka tī latvīšu i latgalīšu volūdai ir dīzgon lobi tulkuojumi. Es rokstu tekstus latvyski i ar tulkuotuoju skaitu latgaliski i praktizeju.
Amanda: Tod cytus reikus tu nimoz naizmontoj?
Naokijs: Nā! Vīneigi vēļ dzīduoju dzīsmis latgaliski.
Amanda: Kaids ir tovs meiluokais izpiļdeituojs?
Naokijs: Nu, es YouTube atrodu taidu dzīsmi “Par Latgolu”.
Amanda: (Dzīd.) Par Latgali, par Latgali…
Naokijs: (Turpynoj.) Mes gluozis paceļsim. Par sovu muotis volūdu lai dzeivis atdūsim. Ar pagali pa pakali, lai daboj rupucs tys, kas sova tāva pogolmā vēļ audzej nazuolis.
Amanda: Nui, tei ir breineiga dzīsme!
Naokijs: Nui, partū es puortulkuoju itū dzīsmi nu latgalīšu iz japuoņu volūdu!
Amanda: Super! Tu ari klausīs cytys dzīsmis?
Naokijs: Tikai itū. Bet redzieju, ka latgaliski ir ari Latvejis himna!
Amanda: Nui, ari Satversme ir tulkuota latgaliski. Ir ari gona daudzi gruomotu, kinu, vuiceibu video, spēļu i cytu materialu. Nazynu, voi tu zyni, tok maņ interesanti saprast, kas teik da teve kai da uorzemnīka, kurs vuicuos latgalīšu volūdu. Kai ari, cik daudzi tu zyni voi izmontoj. Tok es apbreinoju, cik mudri tu esi īsavuicejs vysys treis volūdys!
Naokijs: Es jau dūmoju, ka muna latgalīšu volūda vēļ ir švaka, i vysi tī materiali vēļ puoruok sarežgeiti deļ mane.
Amanda: Ka tev kū vajag i gribi vaira vuiceitīs, drūsai vaicoj! Bet parkū senpryušu? Tei ari ir interesanta izvēle, kurū vuiceitīs nu vysu īspiejamūs pasauļa volūdu.
Naokijs: Senpryušu volūdu es suoču, jo navarieju izavēlēt storp latvīšu i leitovīšu volūdu. Tys beja cīši sarežgeiti, jo tik 50 cylvāki pasaulī runoj itymā volūdā. Pyrma nedelis Viļņā sasatyku ar vīnu dzeivuotuoju i mes runuojom senpryušu volūdā.
Amanda: Cik labi tu puorzynoj itū volūdu?
Naokijs: Vēļ pašvaki, tok lobuok nakai latgalīšu.
Amanda: Pa munam, tys tod ir cīši labi, jo ari latgaliski tu runoj i saprūti labi!
Naokijs: Paļdis!
Amanda: Kur tu meklej tūs draugus? Voi tu daudzi ceļoj, atrūņ jūs internetā, kaiduos apmainis programuos, studejuos?
Naokijs: Navaru tai konkreti pasaceit, jo kotrs gadīņs atškireigs, tok vysbīžuok internetā īpasazeistu.
Amanda: I cik ilgi tu niu byusi Latvejā? Kur celi tuoļuok tevi vess? Iz Japuonu?
Naokijs: Septembrī es braucu atpakaļ iz Japuonu.
Amanda: Cik ilgi tu jau niu ceļoj? Saprotu, ka esi bejs vysuos Baļtejis vaļstīs.
Naokijs: Vēļ beju ari Suomejā!
Amanda: I kod vēļ tu plānoj atsagrīst Latvejā? Voi niu brauci tikai atsapyust voi kaiduos dareišonuos?
Naokijs: Maņ beja treis īmesli – ceļuot, sasatikt ar draugim i atrast dorbu.
Amanda: Kurā vaļstī tu gribi atrast dorbu?
Naokijs: Latvejā voi Igaunejā.
Amanda: I kai tev saguoja?
Naokijs: Vēļ nasaguoja. 2022. godā, kod studieju Igaunejā, maņ jau beja dūma palikt tī voi Latvejā i struoduot, bet navarieju, jo maņ nav Eiropys Savīneibys piļsūneibys. Es jau meklieju daudzi firmys i kompanejis, tok ituo īmesļa deļ maņ nasaguoja ari itūreiz.
Amanda: Skaidrys. Voi tu kaidreiz plānoj dabuot Latvejis voi Igaunejis piļsūneibu?
Naokijs: Pagaidom nā. Puoruok sarežgeiti niu tys ir. Maņ vystik vēļ vajag ari Japuonys piļsūneibu, bet ari tī ir sarežgeitai ar dorbu. Dzeive Japuonā nimoz nav tik loba, eipaši dorba kultura ir švaka.
Amanda: Saīt, ka tev lobuok grybātūs struoduot Eiropā, na Japuonā?
Naokijs: Na vysā Eiropā, tik Latvejā voi Igaunejā, varbyut vēļ Ungarejā.
Amanda: I kū taišni tu gribi dareit? Kū struoduot?
Naokijs: Es dzeivuoju Igaunejā, jo es beju magistra students. Maņ ir treis magistri – viesturē i geopolitikā. Grybātu dorbu, kas saisteits ar itom temom.
Amanda: Cereju, ka tev saīs atrast dorbu ite i dareit tū, kas pateik! Soki, kod nuokušū reizi brauksi iz teni?
Naokijs: Vēļ nazynu.
Amanda: Vyspuor grybu tevi uzslavēt – tova motivaceja vuiceitīs tik daudzi mozūs volūdu maņ ruodīs apbreinojama. Tu īdvasmoj ari mani!
Naokijs: Ar latgalīšu volūdu ir tai, ka eistyn ir daudzi īspieju vuiceitīs itū volūdu. Vēļ grybu pasaceit, ka tod, kod asu Latgolā, jiutu, ka ite ir cīši lela gostmīleiba.
Amanda: Breineigi, tu pat izmontoj taidu vuordu kai “gostmīleiba”! Tu tū tai sajuti, nui?
Naokijs: Nui! Runojūt vēļ par volūdu – kod es nazynu kaidu latvīšu voi latgalīšu vuordu, es izmontoju boltkrīvu volūdys vuordus, i sacynuoju, ka daudzi latgalīši saprūt ari boltkrīvyski.
Amanda: Jā, tai varātu byut. Latgolā ir dīzgon daudz boltkrīvu, ari pūļu. Pīrubežā eipaši dzeivoj vysaidu tauteibu dzeivuotuoji.
Naokijs: Nui, deļtuo maņ cīši patyka Ludza. Es skaiteju, ka tī bejs daudz igauņu i ir taida Ludzys igauņu volūda. Es beju Ludzā pyrma diveju nedeļu, dīvamžāļ tī nivīns igauniski narunuoja, bet par Ludzys igaunim beja daudzi informacejis.
Amanda: Varbyut tev iz sarunys beigom ir kaids vieliejums latgalīšim? Kai japuoņam, kurs zyna tik daudzi par Latgolu, myusu viesturi i volūdu? Jo pat vysi latgalīši nazyna latgalīšu volūdu. Ari Latvejā cylvākim ir vysaidi redzīni par latgalīšu volūdu.
Naokijs: Latgalīšu volūda ir duorgums. I es lyudzu latgalīšus runuot latgaliski, jo Latvejā ir treis volūdu tauta, i latgalīšu volūda ir breineiga volūda. Es asu bejs vairuokuos Latgolys piļsātuos, i es mīļoju, ka Latgolā vēļ dzeivoj latgalīša gors. Beiguos varu pasaceit, ka Latgola ruļavoj!
Amanda: Super, maņ beja prīca parunuot ar tevi. I tys, kū es varu pasaceit tev – esi par sovu latgalīšu volūdu puorlīcynuotuoks, jo tu eistyn labi runoj i roksti latgaliski! Tu mani ari kai latvīti motivieji vuiceitīs lībīšu volūdu, jo Latvejā eistyn ir treis volūdys!
Naokijs: Paļdis tev! Vysu lobu tev!
Amanda: Palic vasals!
Saruna nūsaslādz.
