Dzejūļu autore: Valija Platace

13. septembrī Rogovkā jau catūrtū reizi iz sasatikšonu Dzejis dīnu laikā aicynuoja dzejis slams latgaliski “Rogovkys dzejis voga”. Tymā pīsadaleja desmit autori – kai pīredziejuši, tai ari jauni vuordi latgalīšu literaturā. Ari itūreiz uzvarātuojis gūds tyka debitantei – Valijai Platacei. Pīduovojam puorskaiteit juos dzejūļus.

***

es knapi elpoju aizbraucūt iz Reigu
īvalku elpu i pīmierstu
ka tū juodora otkoņ i otkoņ
i tai vysu jauneibu
es knapi elpoju
vysi tī skaistī cylvāki
vysi tī drēbu i gordumu kolni
gaismys gaismenis
speideigūs žurnalūs radzātys sejis
muojis kas puordur muokūņus
muojis kas elpoj viesturi
spūžys mašynys krutys školys
tramvaju klaudzūņa
muzeju mīrs izstuodis izruodis

Reiga ir muna paradize
Reiga ir bilete maņ

tū ka kaut kur tī tak veina upis
i kokys kolni teik sašņaukti dagunūs
tuo vysa es vēļ nazynu
asmu tik jauna i naiva
i nikuo naredziejuse

jauneibā es apžylbstu nu leluos piļsātys
nu īspiejom i variešonom
nu vysa radzātuo i naradzātuo
i nu dadūmuotuo

es tī grybu palikt grybu īaugt
grybu dzeivuot i speidēt
byut vīna nu Latvejis zvaigznem

rokstu CV i syutu syutu
a nivīnam navajag proviņcis bārna
ar prostu diplomu kabatā
bez talantim i bez rodim

Reiga nūvalk rūbežys
Reigai es asmu līka

i maņ kauns
es nūeju molā
pasliepūs cytā piļsātā
bet iz Reigu vīnolga skrīnu
kod maņ ir labi
a vēļ bīžuok kod nasagrib dzeivuot

i tod vīndīn storp vysu tū spūžumu
es pīstuoju i radzu
ari tī ir nūlupušs muojis
ari tī ir vītys kur meizali aizsyt elpu
jā cylvāku pylnys īlys
bet daudzim ir nadzeivys acs
daudzim ir izslāgtys sejis

beidzūt es līkūs mīrā
palaižu Reigu vaļā
laikam pīaugu

***

es nivīnam vaira natycu
man ir bez goda treisdesmit
glupū naivumu kas palics manī
es sliepu zam puordrūšeibys
skalim smīklim i eisom maiceņom
tī divdesmit centimetri boltuo vādara
ir kai lineja
storp dzeivi pyrms i ar tevi
tī divdesmit centimetri munys uodys
tev ir kai īdrūšynuojums izlyugt iz deju
kai signals ka var daīt kluot
plyku vādaru staigoj tikai maukys
tū tu maņ pasok’
piec pusūtra goda
i vīnom dzemdeibom
mums vādars tūbreid ir pīsagts
a munu cici zeiž myusu meita

bet tūpavasar kod sasateikam
es nūsprīžu ka
vīnkuorši juosaļaun straumei
nav kuo beitīs
tu tak naesi munā gaumē
vasalu nedeļu es nasaprūtu
tu esi bandits ci lykumsorgs
tei rūbeža nav nūlosoma ni tūbreid ni šudiņ
vasalu nedeļu es nasaprūtu
a patom jau vīnolga

kai taidā karuselī skrīn dīnys
vīnā tu blokus
a cytā aizej
tu aizej i atsagrīz
aizej i atsagrīz
tev taids krizis periods
es tevi gluobu
tu dzer bez suota
es tevi gluobu
i kluseju

a tevi šyupoj
storp nycynuojumu
klīdzūt ka namīl
i draudim ka naļausi aizīt
storp zalta syudenim
ruopuošonu iz celim
izalyudzūt pīdūšonu jau sazyn kurū reizi
i montu laseišonu pyrms otkoņ aizciert durovys
storp apgolvuošonu ka asam tev svareigys
i dīnom ilgu naīšonu da sātai

es ari nagrybu vaira tī īt
beistūs poša nu sevis
nu vysa tuo malnuo
kas manī aug
pyrms es nūsleikstu
pyrms es paspieju izdareit tū
kas nav lobojams
tu aizver durovys pādejūreiz

sešarpus godus es tevi mozgoju
nu seve nūst
ar osorom
i ar dušu

tikai daudzus godus vāluok es pīkustu nu klusiešonys
i izklīdzu savu suopi internetā
par tū samoksoj myusu bārns
otkoņ i otkoņ
tu
jū satīkūt
sok’ ka jai nav pasaveics ar muoti
tovūs stuosteņūs es asmu merkantila kuce
kas izmontovuse tovu duorgū sāklu
i radejuse bārnu viņ sev
a tu

tu es mīlūšs tāvs
tys nikas ka meitu sateic
reizis treis godā
kod dzymuse kod dūts vuords
i godskaitlim mainūtīs
jius siedit mašynā
pastaigojās tak tikai duraki
ari kafejneicys tev nav pa pruotam

atsagrīžūt ustuobā
myusu meita kotru reizi raud
reizem es glaudu juos motus
a cytreiz maņ vaira nav spāka
aizluopeit tūs caurumus
kurus tu bārnā izplēs
bet ar kotru dzāruoja zvonu
ar kotru rānu
tu arviņ vairuok izpleisti nu juos

es aizveru acs
i gaidu tū dīnu
kod tu izpleissi
i nu mane

***

jei pīdzymst korstā vosorā
jei pīdzymst i es suocu beitīs
beistūs naīlikt nadaviļkt
beistūs nadamīlēt voi tīši ūtraižuok
bet vairuok par vysu pazaudēt beistūs

kod myusu pasaule saryuk
da myus divom
muna pasaule saryuk
da jai

myus sasīn tik daudz
miļjonim kūpeigi nūītu sūļu
sarunys podušku sabokstūt
voi steidzeiga buča pyrms mīga
smīkli i cāls muorks osoru

myus izškir tik daudz
muns nūgurums
i munys nūjausmys
juos mali juos draugi
myus izškir juos pīaugšona
i slāptī da nadaslāptī
cigarešu dyumi

ceinis īilgst
ceinis ar i par jū
godi i pīrodumi teik izsvīsti
izsmīti aprīti
ceinis īilgst
mes kūžam vīna ūtrai
da ašņam
da bezgaleibai
da malnam izmysumam

i tod vyss beidzās
vīnu reitu teik puorvylkta streipe
leli maisi i montu kolni
atā mam
raud’ ci naraud’
vīnolga
mīļ’ tu ci beistīs

pasaule uzspruogst
pasaulis vairuok nav

chat gpt soka prīškā
beidz stresuot
izelpoj

jai tei tik myuslaiku separaceja
a maņ videji smoga depreseja

---

Publikaceja sagataveita ar Vaļsts kulturkapitala fonda atbolstu.