Rokstu sagataveja: portals lakuga.lv

Itymā nedeļgolā, svietejūt Mikeļa dīnu aba rudiņa saulgrīžus, vysaiduos vītuos Latgolā iz tiergim sabrauks kai tī, kas vysu vosoru audzejuši, ražuojuši i gatavejuši, tai ari pierkt grybātuoji. Taipat breivdīnuos byus vareiba na viņ īsapierkt, tok ari muzicēt voi svieteit Mikeļa dīnu ar goreigū muzyku bazneicā. Portals pīduovoj nedeļgola pasuokumu izlasi, bet cytom latgaliskom aktualitatem var sekuot leidza ari myusu nūtikšonu kalendara sadaļā.

Tiergs i slūtu svātki Kolupā

Sastdiņ, 27. septembrī, jau nu 8 stuņžu reitā Augšdaugovys nūvoda Kolupā vysi teik gaideiti iz Mikeļa dīnys godatiergu i slūtu svātkim “Slota rokā – ābols grozā!”. Školys sporta laukumā byus tiergs i foto styureits. Eipašs gūds tiks slūtom – byus slūtu izstuode, slūtu sīšonys meistardarbneica, slūtu mūdis parade i pat varēs paraudzeit slūtys kuota zupu. Nu 10 da 14 stuņžu byus ari aktivatis bārnim – pīpyušamuos atrakcejis i lelformata spēlis, tymā skaitā ari latgalīšu kulturys kusteibys “Volūda” stends ar spēlem latgaliski.

Večerinka Pušmucovā

Sastdiņ, 27. septembrī, 17 stuņdēs Ludzys nūvoda Pušmucovā sasatiks tautys muzykanti i kapelys iz kasgadejim svātkim “Večerinka Pušmucovā”. Registraceja jau suocūt nu 16 stuņžu. Indivualī muzykanti muzicēs 10–15 minutys, kapelys – 25–30 minutys. 

Gaigalovā aicynoj iz godatiergu “Mikeļa skalins”

Sastdiņ, 27. septembrī, tierga apmaklātuoji jau nu 9 stuņžu reitā laukumā pi Gaigalovys kulturys noma varēs nūpierkt lauku lobumus, stuodus, amatnīku i mozūs ražuotuoju produkceju. 10 stuņdēs nūtiks leluo andele – tamā byus vareiba sasamaineit ar stuodim i cytom nūdereigom lītom. Sovpus nu 11 stuņžu godatierga gostus prīcynuos dzīsmis i daņči, kurūs pīsadola Gaigalovys pogosta kulturys noma deju grupa “Raffaello”, Strūžānu pogosta kulturys noma vokalais ansamblis “Sidrabrasa” i Sakstagola pogosta folklorys kūpa “Kolnasāta”. 

Trikmīņs vysim Ludzā

Sastdiņ, 27. septembrī, 18 stuņdēs J. Soikāna Ludzys muokslys školā nūtiks naformals muziciešonys pasuokums “Trikmīņs Nr.1 jeb muziciešona vysim”. Vokora gosti byus bīdreibys “Organic Synergies” puorstuovi Edgars Provejs i Mafalda Garsija (Mafalda Garcia). Pasuokumu organizej bīdreiba “Teātris azotē” sadarbeibā ar J. Soikāna Ludzys muokslys školu i Ludzys nūvoda Bārnu i jaunīšu centru.

Ruskulovys katuoļu draudze aicynoj iz Mikeļa dīnu Kūkovā

Svātdiņ, 28. septembrī, gūdynojūt sakralū montuojumu i īdzeivynojūt draudzis tradicejis, jau ūtrū godu piec kuortys Ludzys nūvoda Saļņovys pogosta Kūkovys cīmā Ruskulovys katuoļu draudze aicynoj iz Mikeļa dīnu. Itymā rudinī palīk 90 godu, kai īsvieteita Ruskulovys Lurdys Dīvamuotis Romys katuoļu bazneica. Tei ir vīna nu vacuokūs Latgolys kūka bazneicu ar boguotu viesturi i naparostu liktini. 13 stuņdēs bazneicā skanēs goreiguos muzykys stuņde, kurā pīsadaleis Saļņovys kulturys noma goreigūs dzīšmu ansamblis “Pieskāriens”, Saļņovys etnografiskais ansamblis, Kuorsovys Muzykys i muokslys školys audziekni, kai ari Mērdzinis kulturys noma dzīduotuojis. 14 stuņdēs sekuos svātku mise, sovpus piec tuos bazneicys duorzā kūpā ar Saļņovys amaterteatra akterim nūtiks rudiņa lobumu izsūle, kurā dabuotī leidzekli tiks zīduoti bazneicys remontam. Draudze aicynoj sevkuru svātku dalinīku jimt leidza ari sovus rudiņa lobumus, kū pīduovuot izsūlei i taidā veidā ar sovu īguļdejumu atbaļsteit bazneicys sakūpšonu.

Rudiņa godatiergs i Mikeļa dīnys putra Pyldā

28. septembrī 12 stuņdēs Ludzys nūvoda Pyldys kulturys noma laukumā sevkurs teik aicynuots iz rudiņa godatiergu “Mikeļs brauc – iz tiergu sauc!”. Programā na tik pierkšona i puordūšona, tok ari lotereja, muzykali prīšknasumi i Mikeļa dīnys putra. 

Tomatu Mikeļs aicynoj iz godatiergu Rēzeknē

Svātdiņ, 28. septembrī, nu 10 stuņžu Rēzekne otkon aicynoj piļsātys dzeivuotuojus i gostus iz Mikeļa dīnys godatiergu. Kai jau īrosts, godatierga aktivitatis nūtiks Latgolys īlā. Kotru godu tiergā gūdā teik calts kaids nu duorzuoju, itūgod eipaša uzmaneiba tiks dagrīzta tomatam. Tierga apmaklātuoji teik aicynuoti izalaseit apgierbu, kas saskaņ ar tomata nūkruosom. Nu vysu apmaklātuoju tiks izalaseits Tomatu karaļs i karalīne.

Sovpus jau nu 11 stuņžu Mikeļa dīnys ļusteigū nūskaņuojumu varēs baudeit Rēzeknis nūvoda amatermuokslys kolektivu koncertā. Par muzykalū nūformiejumu pasaryupēs pyušamūs instrumentu orkestris “Rēzekne”. Byus ari meistarklasis, aktivitatis bārnim, tomatu iedīņu gataveišona i, prūtams, ari degustaceja.