Rokstu sagataveja: portals lakuga.lv

Latgolys regionaluo televizeja (LRT) turpynoj itūvosor aizsuoktū raidejumu cyklu “Latgales pūra lāde – atdzimšana”. Trešū raidejumu par Latgolys kulinarū montuojumu varēs vērtīs 29. i 30. septembrī kanalā TV24, kai ari 1. oktobrī ReTV kanala vierszemis apraidē Latgolys regionalajā televizejā.

Projekts “Latgales pūra lāde – atdzimšana” viestej par senejūs tradiceju īdzeivynuošonu, kulturys montuojuma atjaunuošonu i saglobuošonu Latgolā. Kotrā raidejumā teik atspīgeļuots senejūs tradiceju atjaunuošonys process, tūs eistynuotuoji i izmontuošona myusu dīnu sabīdreibā, taipat ari skaidruots viesturyskais aspekts i perspektivys iz prīšku.  

Trešajā raidejumā tiks stuosteits par Latgolys kulinarū montuojumu, kas nav tik senejis receptis, bet ari regiona atpazeišonys zeime, kas paleidz saglobuot vītejuos tradicejis i dasaisteit turystus unikalu garšu baudeišonai.  

Raidejuma veiduotuoji kūpā ar Latgolys kulinaruo montuojuma puorstuovim devēs iz Jelgovu, kur nūtyka Latvejis nūvodu Sīra dīna. Tamā kulinaruo montuojuma tradicejis cytim Latvejis nūvodim ruodeja Aglyunys pusis Mežinieku kupluo saime, zemnīku saimisteibys “Juri” saiminīki Lideja i Jurs Lubuoni, kai ari saiminīks Dainis Rakstiņš ar “Kolnasātā” dareitū olu. Taipat raidejumā tiks gasteits bryuvātuoja Daiņa saimisteibā i izzynuota kai bryuviešonys gaita, tai ari ituos nūsadorbuošonys aizasuokšona. Taipat kūpā ar Ēriku Kondrātu, kurs vaira zynoms kai Ludzys amatnīku centra vadeituojs, tiks pagataveita Ludzys pusei rakstureiguo spāka putra.

Kab plotuok viesteitu par Latgolys kulinarū montuojumu, raidejums apmeklēs ari kulinaruo montuojuma centru Kruoslovā, kura vadeituoja Tatjana Kozačuka īpazeistynuos ar bīdreibys darbeibu i īsaisteitajim bīdrim, kai ari ar sajimtū nūviertiejumu kai nu vītejūs, tai uorvaļstu ekspertu.

Projekta “Latgales pūra lāde – atdzimšana” mierkis ir sataiseit četrus televizejis raidejumus par četrom senejom tradicejom i tūs veidūlu myusu dīnu kulturā, turysmā i izklaidis jūmuos. Kotrā raidejumā tiks atspīgeļuoti pīmāri, kai senejuos tradicejis teik atjaunuotys myusu dīnu vidē – pīmāram, plūstuošonys tradiceju populariziešona Daugovys lūkūs, tradicionalūs iedīņu meistarklasis i tūs nūviertiejums Eiropys Savīneibys leiminī, taipat ari dzīduošonys tradiceju izzynuošona – teicieju apzynuošona i dzīšmu kruojumu veiduošona, kai ari vysaidu omotu prašmu meistarklasis. #SIF_MAF2025

Raidejumu “Latgales pūra lāde – atdzimšana” varēs vērtīs: pyrmūdiņ, 29. septembrī, kanalā TV24 20.30 stuņdēs. Atkuortuojums – ūtardiņ, 30. septembrī, kanalā TV24 12.30 stuņdēs. Trešdiņ, 1. oktobrī, 17.30 stuņdēs raidejumu varēs vērtīs ari ReTV vierszemis apraidē. Piec kotra raidejuma puorraidis televizejā tūs varēs atrast LRT sātyslopā lrtv.lv, kai ari vītnēs Facebook, YouTube i platformā xtv.lv.

Raidejuma veiduotuoji gaideis ari jiusu atsauksmis i īsacejumus viestulēs pa postu, adrese: Rēzekne, Atbreivuošonys aleja 98, LV-4601 ar nūruodi Latgolys regionalajai televizejai voi LRT socialūs medeju lopuos, kai ari e-postā lrt.zinas@inbox.lv voi zvonūt/rokstūt iz tel. nr. 26339536.

Projektu finansej Medeju atbolsta fonds nu Latvejis vaļsts budžeta leidzekļu. Par raidejumu cykla “Latgales pūra lāde – atdzimšana” saturu atbiļd SIA “Latgales reģionālā televīzija”. #SIF_MAF2025

Publikaceju apmoksoj Latgolys regionaluo televizeja