Rokstu sagataveja: portals lakuga.lv

Grupa “Unknown Artist” sadarbeibā ar Azarazarembo nu apvīneibys “Cegly” izdūd jaunu dzīsmi “Līts naleist”, kas kolpoj kai rituals, kod leita ir bejs par daudzi. Grupa dzīsmi pīsoka tai: “Lai itei dzīsme ir kai narymstūša līsme, kas pagluobs tevi nu brīsmem i naškeistom tīksmem!”

Grupys solists Māris Keišs stuosta: “Itei dzīsme ar vīgli pacylojūšu humora izjiutu radeita vīnā nu grupys “Unknown Artist” mieginuojumu Reigā. Tymā vokorā grupys lideram Arņam Bukšam nasaguoja dūmuot par kū nūpītnu, i tai roduos ideja izveiduot dzīsmi par tū, ka līts naleist. Ir jau ir daudz dzīšmu par tū, ka līts leist voi ir saulains laiks, bet na par tū, ka ir vīnkuorši apsamuocs, bet nikas napiļ nu dabasu. Saguoja ari tai, ka taišni eisai pyrma plānuotuos video izlaisšonys laiks palyka daudz labvieleiguoks i sausuoks.”

Video kūpā ar grupys dalinīkim pīsadola nūslāpumainais, bet atpazeistamais muokslinīks Azarazarembo nu apvīneibys “Cegly”, kurs video stuostā teik nūlaupeits i nūpratynuots. Stuosts nūteik Škilbānu pogostā i Bolvu nūvodā. Cylvāks, kurs pats nagribēja veikt nūlaupeišonu, nūleiga nūlaupeituoju komandu, kab izpratynuotu īspiejamū vaineigū, parkū laika apstuokli ir taidi, kaidi jī ir. Klients īdeve nūlaupeituojim biļdis, kab jī varātu identificēt pratynojamū cylvāku. Blūdejūt pa Bolvu īlom i parkim, jim beidzūt izadūd atpazeit “uperi”. Nūlaupeišonys plans beja veiksmeigs. Izpratynuotuojs, nūsaklausūt “aizturātuo” līceibuos, nabeja puorlīcynuots par tū, ka jis soka taisneibu.

Par sadarbeibu ar Azarazarembo Māris soka tai: “Mums vīnkuorši cīši pateik juo bolss. Taipat jis ari izdūmoj atbylstūšus tekstus myusu vaibam.”

Dzīsme īraksteita “Bigmaar’s Records” studejā. Videoklipa operators i montažys režisors ir Salvis Mass (Waltz Visuals), tok scenareja autors – Arnis Bukšs. Videoklipā pīsadola Guntis Silickis, Valters Murāns i puiši nu grupys “Unknown Artist”.

“Unknown Artist” ir muzykala grupa, kas īt nu Upītis. Grupu reizem raksturoj kai “progresivu jaunīšu (tagad veirīšu) grupu”. Tei dorbojās Latgolys kulturys skotivē, pīsadolūt vītejūs festivalūs, i pādejā laikā ari sasadorboj ar cytim muokslinīkim. Septembrī grupys īprīškejais singls “Rika Tak” pīsadaleja aptaujā “Latvijas Sirdsdziesma”.