Rokstu sagataveja: portals lakuga.lv

Kab svieteit 40 godu rodūšuos darbeibys jubileju, dzīduotuojs, muziks i akters Andris Baltacs īlyudz iz sirsneigu i kruosainu koncertsereju “Latgalietis pasaulē”. Gaidomi seši koncerti Siguldā, Jelgovā, Talsūs, Ciesīs, Reigā i Rēzeknē.

Andris Baltacis itūrudiņ i cyta gods suokuos aicynoj iz koncertim vairuokuos Latvejis piļsātuos. Programā byus daudzveideigi rodūšuos darbeibys pūsmi – nu šlagera i tautysdzīšmu leidz pat rokmuzykai i operys skaņdorbim. Koncertā naizpaliks ari pasauļa muzykys pērlis, kurys skateituoji īpazyna šovā “Pārdziedi mani”.

Iz skotivis Andram pīsavīnuos muziki: pianists Juris Kristons, gitarists Jānis Kalniņš, basgitarists Modris Laizāns, bundzinīks Ivars Kalniņš, vokalais trio “Oranžās…”, taipoš ari cyti eipašī gosti. Koncerta muzykalū pusi papyldynuos doncuotuoji horeografis Beātis Svarinskys vadeibā. Beletus var nūpierkt ITE.

Andris Baltacis, vaicuots par koncertserejis nūsaukuma “Latgalietis pasaulē” izalaseišonu, atsoka, ka, pa jam, myusu dīnuos ir cīši svareigi byut atvārtam i pasauleigam. “Es skaitu, ka mes kai latgalīši asam palykuši drupeit “īspīsti” poši sevī, myusūs tryukst tuos latgaliskuos atvierteibys, ar kurū asam palykuši slovoni vysā Latvejā. Tok tamā pošā šaļtī ari poši sovā vydā ceinejamēs par pareizu volūdu i tū, kaidai tai vajadzātu byut. Deļtam ari taids nūsaukums koncertserejai, ka mums juobyut pasauleigim, latgalīts var dzīduot i angliski, i fraņciski, i cytuos volūduos, tok svareigi, kab ari pasauļs radzātu myus, latgalīšus.” Andris ari pastreipoj, ka koncertsereja byus vaira vizuala, byus vaira deju, nakai tys cytu reizi īrosts.

Andra Baltača muzykalais ceļš ir veds cauri vysvysaidim žanrim i formatim. Nu kapelys “Dunduri” i grupom “Stikls” i “Baltie lāči” leidz daleibai televizejis šovūs, pīmāram, “Dziedi ar zvaigzni” i “Pārdziedi mani”. Taipoš ari nu dzīsmem leidz muzykalom izruodem, nu šlagera leidz pat operai. 2025. godā Andris kūpā ar Daini Skuteli triumfēja “Latvijas Sirdsdziesmas” finalā ar dzīsmi “Latgalietis ir”.