Rokstu sagataveja: portals lakuga.lv

Pi skaiteituoju tics žurnala “A12” oktobra/novembra numers, i tymā var puorskaiteit intervejis ar zemis sorgu Edgaru Timoškānu, Lūznovys muižys puorvaļdneicu Ivetu Balčūni i kulturys projektu vadeituoju Ingu Žirguli, žurnalisti, literati i gruomotu blogeri Ingu Kaļvu-Mininu, kai ari cytys sarunys i stuostus. Taipat žurnala redakceja izplatejuse uzsaukumu literatim, aicynojūt īsyuteit dorbus jaunajam tuo atvārumam “Pītura”.

Žurnala “A12”, kas ir vīneigais žurnals, kas viestej par Latgolys ļaudim i jūs stuostim, redaktore Ināra Groce tuo īvodā roksta: “Rudiņs puorjam dobu i īgulst dūmuos, ir laiks nūstuot, īsavērt šudiņdīnā i nūviertēt tū, kas mums pīdar. Kam eistineibā vīneigais laiks, kas mums pīdar, ir niu. I itys “niu” bīži viņ vysulobuok izmierejams cylvākūs – satyktajūs, īpazeitajūs, ari tymūs, kas palykuši tik atmiņuos. Rudiņs ir atguodynuojums par pastuoveigajom vierteibom, kuruos palīk, ka vyss cyts puorsamej. Mīlesteiba i sirds dorbi ir tī, kas vysuvaira pīškir jāgu kotrai dīnai.”

Itūrudiņ jaunais “A12” aicynoj skaiteituojus iz literaru i kulturys ceļuojumu pa Latgolu. Jaunajā izdavumā skaitomi dzili personeibu portreti, vītejūs kulturys iniciativu stuosti i reportažys, kas atspīgeļoj regiona dzeivis daudzveideibu:

• Zemis sorgs Edgars Timoškāns stuosta par mocikletim i braucīnim iz Ukrainu;
• Lūznovys muiža cauri laikim – interveja ar puorvaļdneicu Ivetu Balčūni i kulturys projektu vadeituoju Ingu Žirguli;
• Rītumu viejs i jiura – Fandango Fonteins Kalita Rēzeknē roda kulturvītu “Līpuoja”;
• Literate Inga Kaļva-Minina doluos skaiteišonys prīcā, īdvasmojūt ari cytus;
• Preiļu viesturis i lītiškuos muokslys muzeja duorgumi boguotynoj piļsātys kasdīnu ar unikalom viesturis līceibom.

Jaunuokajā žurnalā “A12” vysu rokstu vydā ari portala lakuga.lv redakcejis komandys taiseitī stuosti – portala redaktore Laura Melne ir autore intervejom ar Fandango Kalitu Fonteinu i Ingu Kaļvu-Mininu. Taipat žurnalā puorskaitoma portala redakcejis sagataveituo informaceja par jaunuokajim gruomotu i muzykys īrokstu izdavumim.

Žurnals “A12” ir vareiba jau vaira nakai 10 godus izzynuot par dzeivi i ļaudim Latgolā i pasaulī, puorskaiteit dažaidus dzeivisstuostus, pīsadaleit viesturyskūs ceļuojumūs laikā i telpā, kai ari byut atkluojumu i puordzeivuojumu dalinīkim. Žurnals izīt 6 reizis godā. Kab atbaļsteitu žurnala byušonu ari iz prīšku, aicynojam abonēt. Jaunuokū žurnala numeri var nūpierkt (kai digitalā, tai taustomā veidā) ite: a12.lv.

Taipat žurnala “A12” redakceja viestej, ka 2026. godā tū papyldynuos literarais atvārums “Pītura” i aicynoj autorus īsyuteit leidz šam napublicātus, puordūmys rūsynūšus dorbus kai latvyski, tai latgaliski – eisproza (leidz 12 tyukstūšom zeimu, īskaitot atstarpis), garūs stuostus (leidz 30 tyukstūšom zeimu), lugys (leidz 18 tyukstūšom zeimu), dzejūļus (1-5). Dorbus var īsyuteit da ituo goda 24. decembra iz e-postu: a12.pitura@gmail.com

Autorim tei byus vareiba īpazeistynuot ar sovu dailradi, skaiteituojim tei byus īspieja pabyut kūpā ar zynomim i jaunim autorim. Sovpus teatra pulks var drūši izavielēt kaidu lugu īstudēt! Na vysod pi rūkys ir gruomota, bet “Pītura” dūs vareibu skaiteit.