Dzīsmei “Lai jau kreit” jauna aranžeja bārnu kora “Zalta pūga” izpiļdejumā
Rokstu sagataveja: portals lakuga.lv
Muokslu izgleiteibys kompetencis centra “Latgolys Muzykys i muokslys vydsškola” bārnu kors pedagogu Andys Lipskys i Juoņa Veličko vadeibā sagatavejuši dzīsmi “Lai jau kreit” jaunā aranžejā i tuos videoklipu. Kai viestej poši autori, itei ir prīcys i pozitivisma deva, kurū kors grib duovuot sovim klauseituojim.
Dzīsmis “Lai jau kreit” autors ir muziks i grupys “Dabasu Durovys” liders Arņs Slobožanins, tok tuos jaunuo, vitaluo aranžeja topuse sadarbeibā ar Ilonu Rupaini. Kai stuosta kora dirigente Anda Lipska: “Itū dzīsmi najauši dzierdieju pa radeju pyrms puora godu, kod gataviejomēs storptautyskuo vargaņu festivala “ORGANismi” koncertizvadumam “Ķiršu koks”. Tūlaik redzejuos, ka tei breineigi īsaderātu izvadumā. Pasyutejom Ilonai Rupainei aranžeju i ar laipnu Arņa Slobožanina atļuovi suocem mieginuot. Dzīsme drupeit naīsaderēja konkretajā projektā, partū nūlykom tū “plauktā” i gaidejom lobuokus laikus. Pārnejuo sezona gadejuos nadaudz breivuoka, deļtam izdūmuojom beidzūt dzīsmi īraksteit i uzfiļmēt ari videoklipu,” doluos pedagoge Anda Lipska.
Niu kors “Zalta pūga” aktivi dorbojās nuokušajam lelajam izaicynuojumam – 10. storptautyskuo vargaņu muzykys festivala “ORGANismi” koncertizruodei bārnim “Atmiņu glabātājam pa pēdām”.
