Rokstu sagataveja: portals lakuga.lv

Kulturys īsacejumus itai nedeļai sagatavejuse Dekteru amaterteatra režisore Ērika Bozoviča. Jei aicynoj atrast laiku kai dorbam, tai atpyutai, naaizmierstūt par pādejim lobumim duorzā, tok napalaižūt garum ari Juoņa Pujata 100. jubilejis nūtikšonys, Gaigalovys amaterteatri izruodi Stabuļnīkūs, koncertus Izvoltā i Rēzeknē, kai ari večerinku Saļņovā.

Nu, rudiņa sezonys lelī dorbi jau byus golā? Šūnedeļ vēl drūši viņ kaidam juonūvuoc nu duorza batvini i būrkuoni, juonūgrīž kuopusti, juoizrūk gladiolu seipūli i jurgiņu gumi… Dažim čakluokajim vyss jau padareits,  tok var dasasaceit par paleigim pi sābru voi pi rodu, lai giutu vēl pādejūs rudiņa sauleitis spaitus i, fiziski dorbojūtīs, kruotu spākus zīmai.

Atpyutys īspieju ari šūnedeļ na moz. Tim, kam interesej viesture i Latgolys cylvāki, pyrmom kuortom 17. oktobrī īsoku braukt iz Latgolys Kulturviesturis muzeju Rēzeknē, kur 11 stuņdēs tiks svieteita muokslys zynuotnīka Juoņa Pujata symts godu jubileja. Tuoļuok programa īspaideiga: 13.00 sasatikšona Nautrānu pogosta Pujatūs ar moto “Akminī kolts”, a 14.00 pasuokums “Muolā grabts” Iļžukolna pogosta “Pūdnīkūs”. Grybu saceit, ka man par Juoni Pujatu eipaša interese – jis eistyn ir muns nūvadnīks, dzims Gaigalovys pogostā.

Tim, kam pateik teatra izruodis, 17. oktobra vokorā byutu juobrauc iz Preiļu nūvoda Stabuļnīkim pasavērt Rēzeknis nūvoda Gaigalovys pogosta amaterteātra “Bykovīši” īstudietū Monikys Zīlis komedeju “Pylns džentlmeņa komplekts” (režisore Valentīna Deksne). Prīca, ka “Bykovīši” lugys īstudej tik latgalīšu volūdā, a šūreiz izmontuots Monikys Zīlis lugys “Džentlmenis ar pannu” pošys autoris radeitais latgaliskais variants. Nūsavieru, patyka.

Natryuks lobu koncertu i muzykys mīļuotuojim. Nūpītnuos muzykys cīneituoji aicynuoti 18. oktobrī dūtīs iz Kruoslovys nūvoda Izvolta bazneicu, kur varēs nūsaklauseit goreiguos muzykys koncertu “Divpadsmit lyugšonys” (klavīris, flauta i bolss). Pamateigu leidza dzīduošonu i breineigu dzīšmu klauseišonūs 18. oktobrī sūla Guntara Rača 60 godu jubilejis koncerts “Gorā” (beleti vēļ ir).

Kaids gon nedelis gols bez balliešonys i doncuošonys! Vysi, kam pateik ļusteigi padoncuot i baudeit lobu muzyku, teik aicynuoti iz Ludzys nūvoda Saļņovys kulturys nomu, kur 18. oktobra vokorā byus Rudiņa večerinka. Tī jius gaida pamateiga kuoju izlūceišona vairuoku kapelu muzykys ritmūs. Natryuks ari pošu saļņovīšu kapelys “Sveicynojam, vielejam”, jī, piec pīredzis zynu, vysod “sprydzynoj”. Tiksimēs Saļņovā, byus ļusteigi!

Lai veiksmeiga nedeļa! Prīceiguokuo ziņa školānim – rudiņa breivdīnys jau tepat!