Rokstu sagataveja: portals lakuga.lv

Vīna nu Igaunejis vacuokūs i leluokūs izdevnīceibu “Eesti Raamat” izdavuse rakstnīka Alda Bukša kriminalromana “Bruoli” tulkuojumu igauņu volūdā. Igaunejis skaiteituojim romans daīmams ar nūsaukumu “Velled”, i tū tulkuojs Hanness Korjuss.

“Bruoli” ir aizraunūšs stuosts par latvīti Edgaru, kurs piec naveiksmeigys pokera spēlis ekskluzivā Londonys klubā teik cītumā Suomejā. Tikom juo jaunuokais bruoļs bez pādu pazyud Igaunejā. Atsabreivojūt nu cītuma, Edgars suoc pagaisušuo bruoļa mekliešonu, kas jū aizvad cauri Igaunejai, Zīmeļlatgolai, Latvejis i Krīvejis rūbežam i Londonai, pa mozam atkluojūt sarežgeitu storptautyskū nalegaluos imigracejis teiklu, aiz kura stuov Krīvejis slapanī dīnasti.

Romana autors Aldis Bukšs par tulkuojumu igauniski stuosta: “Tys ir bejs muns sapyns jau ilgu laiku – izdūt “Bruoļus” igauniski, taidā veidā vairojūt kai Bolvu, tai vysys Latgolys atpazeistameibu Igaunejā. Cīšu ceru, ka romans, kurā darbeiba daleji nūteik ari Igaunejā, igauņu skaiteituojim paliks tikpat īmeiļuots kai latvīšu skaiteituojim, styprynuos myusu tautu kūpeibys izjiutu i spieju kūpeigi puorvarēt myusu izaicynuojumus. Maņ ticīs, ka tys paleidzēs pīvylynuot ari igauņu turystus myusu nūvodam. Miļzeigs paļdis munim skaiteituojim! Bez jiusu interesis ituo tulkuojuma nabyutu!”

Romans “Bruoli” ir pyrmais kriminalromans, kas izguojs kai latvīšu literarajā volūdā, tai latgalīšu rokstu volūdā. 2021. godā “Bruoli” sajēme Latgalīšu kulturys goda bolvu “Boņuks 2020”, bet 2023. godā Latvejis Radejā tyka translāts romana radejis īstudiejums pīcuos epizodēs. Leidz šam “Bruoli” ir tulkuoti leitovīšu i angļu volūdā. 

Angļu volūdā romans ar nūsaukumu “Brothers” ir daīmams e-gruomotys veidā vodūšajā e-gruomotu platformā Amazon.com.

Hanness Korjuss, kurs igauņu volūdā tulkuojs romanu “Bruoli”, pyrma tuo ir tulkuojs taidus zeimeigus latvīšu autoru dorbus kai Mārys Zālītis “Pieci pirksti”, Norys Ikstenys “Vīrs zilajā lietusmētelī”, Raiņa “Kastaņola” i cytus. Romana tulkuošona igauņu volūdā veikta ar “Latvian Literature” platformys atbolstu.