Upītē nūtiks seminars par kūpīnu i kulturys montuojuma aizsardzeibu
Rokstu sagataveja: portals lakuga.lv
24. i 25. oktobrī Bolvu nūvada Namaterialuos kulturys montuojuma centrā “Upīte” nūtiks seminars “Kopienu informētība un prevencija drošībai potenciālu risku, katastrofu un militāru konfliktu situācijās”, kurā pīsadaleis kulturys, religiskūs instituceju i kūpīnu puorstuovi, informej Latvejis Nacionalais kulturys centrys (LNKC).
“Izgleitojūšuo pasuokuma mierkis ir skubynuot kūpīnys apsazynuot i atpazeit apdraudiejumus, izviertēt ryskus vysaiduos krizis situacejuos, kai ari izprast sova materialuo i namaterialuo kulturys montuojuma aizsardzeibys nūzeimi i praktisku reiceibu kai gataveibys pasuokumu kontekstā, tai uorkuortys apstuokļūs,” skaidroj LNKC direktore Signe Pujāte.
Namaterialuos kulturys montuojuma centrys “Upīte” kai sadarbeibys partners i seminara nūtikšonys vīta izalaseits apzynuotai, kam, vysupyrma, LNKC kompetence ir taišni namaterialais kulturys montuojums (NKM) i dorbs ar aktivom NKM kūpīnom i individim. Pa ūtram, 2018. godā Latvejis Nematerialuo kulturys montuojuma sarokstā īkļautuo Upītis kulturtelpa atsarūn Bolvu nūvoda Škilbānu pogostā – natuoli nu agresorvaļsts rūbeža.
Pīsadolūt ekspertim nu Vaļsts guņsdzieseibys i gluobšonys dīnasta (VUGD), Vaļsts rūbežsardzis, Zemissardzis, Latvejis Nacionaluo arhiva, Vaļsts rūbežsardzis (VRS) Viļakys puorvaļdis Bruņuojuma i inžinertehniskūs leidzekļu dīnasta i Bolvu nūvoda pošvaļdeibys, seminara pyrmajā dīnā tiks snāgtys teoretiskys zynuošonys par civiluos aizsardzeibys sistemys darbeibu Latvejā i reiceibu vysaiduos krizis situacejuos, par pošvaļdeibys lūmu katastrofu i militaru konfliktu situacejuos, kai ari kulturys montuojuma gluobšonu i saglobuošonu vysaiduos krizis situacejuos.
Ūtrajā seminara dīnā dalinīki dorbuosīs grupuos, rysynojūt VUGD sagataveitus praktiskus aizdavumus, kas sasaisteiti ar realū vidi.
LNKC direktore Signe Pujāte seminarā īpazeistynuos ar Upītis kulturtelpys rysku nūviertiejumu, kū jei eistynuoja kūpā ar Upītis NKM kūpīnys puorstuovim, pīsadolūt Storptautyskuo kulturys vierteibu saglobuošonys i restauracejis pietejumu centra (ICCROM) i Kulturys ministrejis reikuotajuos vuiceibuos “READY” vysaidu vaļstu kulturys montuojuma nūzaris profesionalim, kurūs praktiskuo daļa nūtyka itūvosor Reigā.
Upītis kulturtelpā reikuotais seminars ir daļa nu LNKC aizdavumu “READY” vuiceibu laikā, kas ilgs da 2026. gods februara. “READY” projekta mierkis ir styprynuot Eiropys spiejis aizsorguot vysvysaidys kulturys montuojuma formys, ari NKM aba dzeivū montuojumu, nu pīaugūšu apdraudiejumu, tymā skaitā klimata puormeju izraiseitu katastrofu i kompleksu uorkuortys situaceju. Projektā akcentāta vītejūs zynuošonu i tradiceju nūzeimeiguo lūma kai gataveibys pasuokumu plānuošonā, tai križu puorvariešonā i atjaunuošonuos procesā.
Seminarā Upītē dabuotuo pīredze tiks jimta vārā, izstruodojūt vodlinejis namaterialuo kulturys montuojuma aizsardzeibai krizis situacejuos, kū veiks LNKC sadarbeibā ar Latvejis Universitatis Literaturys, folklorys i muokslys instituta vodūšū pietneicu, projekta “READY” dalineicu Ritu Zaru.
