Rokstu sagataveja: portals lakuga.lv

Pi klauseituoju tics vokaluos grupys “Latvian Voices” jaunuokais albums “Rotā”, kurā apvīnuotys desmit spūdruokuos komponistis i grupys lideris Laurys Jēkabsonis pādejūs godu tautys muzykys aranžejis i originaldorbi sešim bolsim a cappella. Kai viestej grupa, kompozicejis sakņojās tautysdzīšmu tradicejā i Baļtejis muzykys sajiutā i sūpluok latvīšu literarajai volūdai izskaņ igauņu, leitovīšu i ari latgalīšu volūda.

“Rotā” ir vīnpadsmytais “Latvian Voices” albums, tok pyrmais, kurā vysys dzīsmis ir tikai i vīneigi Bolvu nūvoda Tiļžys pogostā dzymušuos i kai Latvejā, tai i pasaulī atzeituos Laurys Jēkabsonis kompozicejis voi aranžejis. Albuma nūsaukums izalaseits par gūdu tuo tituldzīsmei, kas pi klauseituoju tyka jau pārņ.

Nu desmit albuma skaņdorbu diveji ir latgaliski. “”Latvian Voices” asam divejis latgalītis, es i Beāte, i mums ir cīši svareigi programuos īkļaut sova nūvoda muzyku,” stuosta komponiste i “Latvian Voices” soprans Laura Jēkabsone. “Par “Muote dieleņu auklieja” tautysdzīsmis aranžiejumu beju dūmuojuse jau vairuokus godus, tok tū pīraksteit izadeve laikā, kod Beātei pīdzyma dāls, i tei ruodejuos poša pīmāruotuokuo šaļts! Itei melodeja ir sastūpama ar vysaidim tautysdzīšmu tekstim, ari teirā latvīšu volūdā, vystik latgaliskuo verseja ir tei, kas manī rezonej vysuspieceiguok.”

“Sovutīs “Zvīdzi, zvīdzi, sērmais zirdzeņ” saraksteju laikā, kod kars beja tema, kas ruodejuos pamasta viesturis gruomotys puslopom i pīminis šaļtim. Tok dīvamžāļ realitate šudiņ ir pavysam cyta. Itei dzīsme myusu koncertprogramā niu ir atroduse cytu vītu ar atškireigu viestejumu nu tuo, kas beja īrosts,” komentej Laura.

Albums pi klauseituoju teik novembrī – mienesī, kod varim izjust eipašu latvīteibys i vaļsts pīdareibys sajiutu. Tautysdzīsme latvīšim rezonej eipaši dzili, i tei jau vaira nakai 15 godu kolpoj ari kai “Latvian Voices” vizitkarte uorzemēs.

“”Latvian Voices” ir muna kompoziceju laboratoreja, kur vysod jiutūs īdvasmuota, atbaļsteita, saprosta i, pats golvonais, rodūši izaicynuota. Rokstūt muzyku maineigajam grupys sastuovam, asu atteistejuse sovu muzykalū stylu i praktiskuos prasmis komponēt maņ meiluokajam instrumentam – cylvāka bolsam. Turu nūceju, ka iz prīšku “Rotā” dzīsmis atrass ceļu pi koru i cytu vokalūs ansambļu, kai ari īdvasmuos myusu dīnu i tautys deju horeografus,” dasoka Laura Jēkabsone.

Jaunū “Latvian Voices” albumu “Rotā” īspiejams klauseitīs vysuos muzykys straumiešonys platformuos, kai ari nūpierkt grupys e-veikalā.

Vokaluo grupa “Latvian Voices” ir vīna nu dažu profesionalūs a cappella grupu Baļtejā. Tuos sastuovā muzicej Laura Jēkabsone, Beāte Krūmiņa, Zane Stafecka-Tene, Paula Pērkuone (Pērkone), Una Stade i Jānis Strazdiņš.