Rokstu sagataveja: portals lakuga.lv

20. novembrī 18 stuņdēs Volūdu sātā (Olūtu īla 33, Reiga) nūtiks Ligijis Purinašys autorvokors “Vysaidys gadejuma mīlesteibys”, informej pasuokuma organizatori. Tymā izskanēs dzejis skaitejumi latvīšu literarajā i latgalīšu volūdā, aktualizejūt sīviškū intimitati, ceiņu par pošnūsasaceišonu i olkys piec vīntuleibys puorvariešonys.

““Vysaidu gadejuma mīlesteibu” byutyskuokuo viests ir najaušeibu fatalismys, kas manifestej sīvītis ceļu cauri godim, godu desmitem i paaudzem, ceinejūtīs par sovu taisneibu, vierteibom i breiveibu, kas pastuov sūpluok tyveibys i sapratnis mekliejumim. Munys dzejis sovpateiba ir kinematografiskums i polifoneja, kai ari spieja cīsšonu narativu puorvērst spāka pozicejā,” stuosta poša autore. Pasuokumā skanēs teksti nu vysu Purinašys dzejis kruojumu (“Sīvīte”, 2019, “Pierobežas”, 2022), apgiunūt juos dzejā konstruātuo sīvītis tāla atteisteibu, tuo kulminaceju sasnādzūt jaunuokajā gruomotā – dzejprozys kruojumā “Magnificat” (2025) publicātajūs tekstūs.

Jaunuokū kruojumu “Magnificat” veidoj pīcys dalis, kuruos apsavārtys sīvītis attīceibys ar buozšonuos viersā pīredzi, ar dzymtū vītu, ar dzymdynuotuojim i cylvākim sūpluok, ar romantiskū partneri i gols golā ar sevi eistyn eksistencialā leiminī, apsazynojūt i pījamūt tū, ka “es” var tyvuotīs “cytam/cytim” tik da nūteikta rūbeža, kurū škārsojūt “es” vystik palīk vīns. Daudzus itaida apsazynuošona bīdynuotu i lyktu raudzeit saisteitīs ar cytim piec vareibys vaira, tok Ligija Purinaša pījam itū patīseibu ar pošapzineigu i pošironisku stoicismu, aplīcynojūt dzejis sīvītis spāku, kod jei palīk vīnatnē ar sevi, i taidā veidā attaisa telpu traumatiskūs vaicuojumu aktualiziešonai. Idejiskū kruojuma dziļumu i dzejis volūdys īdarbeibu pastyprynoj dzejprozys forma, kū īdvasmuojuse lyugšonu stilistika, kai ari smolkais, unikalais poetismys, kaids rakstureigs Ligijai Purinašai.

Ligija Purinaša ir latvīšu dzejneica, kas roksta latvīšu literarajā i latgalīšu rokstu volūdā. 2019. godā jei debitēja ar dzejis kruojumu “Sīvīte”, kam sekuoja “Pierobežas” (2022) i “Magnificat” (2025). Purinašys dzeja tulkuota angļu, vuocu, čehu, īru, veravīšu volūdā. Ar skaitejumim jei uzastuojuse Skotejā, Leipcigā, Berlinē, Velsā, Londonā, Kopenhagenā, Tartu. Paraleli tam dorbuojusēs kulturys žurnalistikā, izdeviejdarbeibā i vardarbeibys prevencejis jūmā. Divejis reizis sajāmuse Latgalīšu kulturys goda bolvu “Boņuks” (2019, 2022), kai ari nomināta Latvejis Literaturys goda bolvai (2020, 2023).