Publikaceju sagataveja: portals lakuga.lv

Vaļsts svātku prīškvokorā portala lakuga.lv skaiteituojim digitalā formatā pīduovojam apsavērt izstuodi “Esmu karavīrs. Pīrūbeža šaļtenis”, kas ļaun īsavērt zemissorga i karaveira kasdīnā, styprynojūt puorlīceibu, ka Latveja teik aizsorguota. Fotografeju autori ir Zemissardzis 32. kuojinīku bataļjona zemissorgi: vacuokuo zemissardze Nina (Ņina) Ivanova i štaba viersseržants Juris Gedušs. Izstuodi sagataveja Zemessardzes 32. kuojinīku bataļjons sadarbeibā ar Latgalīšu kulturys bīdreibu i ar Aizsardzeibys ministrejis atbolstu.

Izstuode ir kai īskaņa bataļjona 35. dzimšonys dīnai, kū gūdynuos 2026. godā. Jau niu bataļjona bejušī i asūšī zemissorgi i karaveiri ir aicynuoti kruot sovus atmiņu stuostus, kab ar tim daleitūs eipašā izdavumā, kū veiduos cyta gods garumā. Izstuodis fotografejis atspīgeļoj profesionaluo dīnasta karaveiru i zemissorgu kasdīnu i militarūs vuiceibu procesu, pylnveidojūt vīneibu kaujis spiejis i gataveibu aizsorguot Latveju. Fotografeju autori ir vīneibu zemissorgi, kas papyldus sovim dīnasta pīnuokumim veic ari militaruo fotografa aizdavumus, fiksejūt militarajā vidē nūteikūšū.

“Fotografejūt Zemissardzis vuiceibys, pats svareiguokais ir byut mobilai. Prūti, ir juobyut lobai fiziskajai sagatavuoteibai, kam sūpluok karaveira ekipiejumam ir juopuorsavītoj ar fotoaparatu. Lāmumi ir juopījam zibineigi – kū īmyužynuot i kaidu viestejumu ar fotografeju izstuosteit sabīdreibai,” tai karteņu autore Nina Ivanova.

Izstuode kluotīnē da 19. novembra apsaverama Latgolys Kulturviesturis muzejā, Rēzeknē, tok 21. novembrī, Zemissardzis 32. kuojinīku bataļjona dzimšonys dīnā, tei ceļuos iz Rēzeknis nūvoda Bieržgaļa kulturys nomu.