Rokstu sagataveja: portals lakuga.lv

Kulturys īsacejumus itai nedeļai, kod svietejam Latvejis Republikys proklamiešonys 107. godadīnu, īsoka Vaļsts rūbežsardzis Ludzys puorvaļdis RIKD Kinologejis nūdalis inspektors (kinologs) Vitālijs Garionovs.

Izmauduot Latveju soltā iudinī

Vīna nu lobuokūs ideju, kai nūgiut vīnuoteibys sajiutu, ir pīsadaleit kūpeigā tradicionalajā soltajā mauduošonā “Peldēsim Latvijai”, kas nūtiks Radopolis azarā 18. novembrī 11 stuņdēs. Tī sasateik kai profesionali rūņuotuoji, tai i taidi, kas soltā iudinī maudojās tik itamā dīnā, kab kūpeigai baudeitu patriotisku nūskaņu pi gunkura ar čaju. Leidza aicynuoti ari leidzjutieji. Itei ir loba ideja, kai īsuokt vaļsts svātku dīnu.

Svieteit svātkus tautystārpā voi kaidā koncertā

18. novembrī, Latvejis Republikys proklamiešonys godadīnā, vysur nūteik svātkim veļteiti koncerti, iz kurim nūteikti ir juoīt, kab baudeitu svātku atmosferu. Tok, ka ir vareiba pošam byut daļai nu kaida pošdarbnīku kolektiva sastuova, leluoks sirds saviļņuojums ir uzastuot taidā koncertā. Pa munam, tautys dejis ir tradicionaluokuo kūpā byušonys īspieja na tik svātkūs, tok ari vysu godu, kam, apvalkūt tautystārpu, ir gūds byut latvīšam. Tuos ir stypruokuos vierteibys, kas vys vēļ dzeivoj myusūs!

Audzynuot bārnūs patriotismu

Na tik itamā nedeļā, bet ari cauru godu školom ir vareiba bārnus i jaunīšus īpazeistynuot ar rūbežsorga profeseju, kai ari redzēt kinologu i dīnasta suņu paraugdemonstriejumus. Kab tū eistynuotu, juoroksta aicynuojums ar lyugumu sevkurai Vaļsts rūbežsardzis puorvaļdei. Vysod ar prīcu pīsadolom itaiduos aktivitatēs. Prūtams, vysod ir vareiba ari pošim braukt ekskursejā iz puorvaļdi voi rūbežsardzis koledžu i apsavērt, kai nūteik rūbežsorga dorbs. Taipat kotru godu mes ari pīsadolam Ānu dīnuos, kur jaunīši var īpazeit myusu profeseju. Radzūt bārnu i jaunīšu interesi par rūbežsorga-kinologa profeseju, ir lelys cereibys, ka Latvejis nuokūtne ir drūsuos rūkuos!

Gūds kolpuot Latvejai!