Rokstu sagataveja: portals lakuga.lv

Literari muzykaluo Andrejdīna nu 1998. gods leluokā voi mozuokā mārūgā i skaniejumā ir Latgolys kulturys telpā. Itūgod tei byus 28. novembrī 18 stuņdēs Lūznovys muižā ar literata Oskara Seiksta e-gruomotys “Apredzeibys. Afflatus” attaiseišonu, autoru grupys “Tekstūra” teksta i muzykalom performancem i lusteigom kadriļom, informej pasuokuma organizatori.

Literats Oskars Seiksts ir naordinara personeiba latgalīšu i latvīšu literaturys kūpainā. Jau īprīškejais kruojums “Atīsmis” (2023) ruodeja, ka, byudams atsvešynuotā pozicejā nu sabīdreibys, Oskars osai radz i divkuoršai suopeigai izjiut civilizacejis slostus i manipulacejis. Kruojums “Apredzeibys. Afflatus” na tik turpynoj tārpynuot cylvāku par eksistencialim vaicuojumim, bet car tyvredzeiguo okularim ruoda, ka muoksleigys attīceibys, organi, intelekts ir myusu dīnu puorbaudejums kūpā byušonai i mīlesteibai. Apredzeibys ir kai naleli pravītuojumi, paredziejumi, kas navys kod nibejs pīsapiļdejs, bet nūteik vysu laiku godu symta i cylvāka vierteibu izpratnis tyvredzeibys deļ.

“Tyvredzeiba rūnās nu mozmīlesteibys. Lobuok naredzēt i tuoļuok nu grāka. Saspert garmani, kas naklausa. Nūneidēt sīvīti, kas atsoka. Izsaut tautu, kas napasakļaun. Satraikšeit pasauli, kuruos nasaprūti. I nūtīsuot smiertei sevi, kas napasadūd. Redzēt ļauts viņ Mīlesteibai.”

Gruomotai ir Muizinīku Evikys (Evika Muizniece) tekstu puorlykums angļu volūdā, partū ka dūmys vīdums i dzalūšais patīsums ir juoruoda ari cytūs volūduos skaitūšajim, nūruoda Latgalīšu kulturys bīdreibys vadeituoja i projekta vierzeituoja Ilga Šuplinska. Angļu volūdys puorlykumus ir izjuts ari redaktors Viljamss Kristofers Horācijs Mavuds (William Christopher Horatio Mawhood), kas jau ilguoku laiku struodoj ar baltu volūdom.

“Izdavumā ir Muizinīku Evikys ilustracejis, kas kūž da kaula, tū atzeist ari tekstu autors. Tai tys ari ir. Vuordam var paīt garum, puorprast. Zeimiejumu puorprast, nasajust jau ir gryušuok. Gruomotu varēs skaiteit, tok turpynojās finansiejuma mekliejumi ari papeira formā izdūtai gruomotai,” komentej Ilga Šuplinska.

Itūreiz Andrejdīnā nabyus īrostuo literaruo kabare, ka tys nasarass iz vītys i spontanai, bet byus tikpat atraktivs i muzykali naprognozejams autoru kūpys “Tekstūra” (Sandra Ratniece, Artūrs Uškāns, Leons Jūlijs Strupītis, Sanita Dāboliņa i c.) literari muzykals tekstTŪRES variants. Sovutīs nūslāgumā varēs ļautīs kadriļu vīglumam i atvierteibai.

Kai jau Andrejim pīstuov, var byut ari cyti gosti i puorsteigumi. Vīna vareiba, kū organizatori pīduovoj: ka raksteisi da 26. novembra (īskaitūt) iz latgalisubidreiba@gmail.com, vari dasaceit autobusu, kas izvoduos maršrutā Rēzekne-Lūznova-Rēzekne.